EMRI-FOTO/ Kush është 15-vjeçari shqiptar që u godit nga treni në Itali

Një ngjarje e rëndë tronditi Italinë të dielën pasdite.

Një shqiptar 15-vjeçar, i quajtur Elion Shala, i lindur dhe rritur në Itali, humbi jetën kur u godit nga treni në qytetin Chiari.

Sipas dëshmitarëve, djali kishte tentuar të kalonte shinat për të shkuar te shokët e tij, që ndodheshin në anën tjetër. Por në momentin që ishte mbi shina, ai u godit nga treni i Eurocity.

Sipas medieve italiane, drejtuesi i trenit nuk kishte vënë re asgjë, ai ndaloi vetëm një kilometër më tutje.

Elioni kishte kaluar pasditen me miqtë dhe do të ktheheshin në shtëpi me tren. Por ai nuk zgjodhi të shkonte në stacion përmes nënkalimit.

Lajmi u përhap me shpejtësi në komunitetin shqiptar, të cilët janë të shokuar. Skenat në vendin e ngjarjes ishin tronditëse, miq që qanin dhe familjarë që ulërinin.

Shqiptari humbi jetën menjëherë. Viktima ishte në vitin e dytë të një shkolle mekanike dhe luante me ekipin lokal të futbollit. Përveç prindërve, ai kishte edhe një vëlla më të vogël.

Miqtë thonë se ai ishte një djalosh i qeshur dhe shumë i dashur.