Identifikohet viktima në Skrapar, policia kishte fshehur ngjarjen, reagon pas publikimit të Berishës
Humb jetën tragjikisht në ujërat e përroit të Tomorricës në Rehovë të Skraparit 55-vjeçarja Sheqere Llahi. Ndërkohë mësohet se policia ka fshehur ngjarjen dhe ka dhënë njoftim zyrtar 24-orë pas ngjarjes pas publikimit të videos nga kryetari i PD Sali Berisha në rrjetet sociale.
Ngjarja e rëndë sipas gazetares së Syri TV, është regjistruar rreth orës 11:00 të së Shtunës në fshatin Gjerbës në Skrapar. 55-vjeçarja ka gjetur vdekjen në ujërat e përroit të Tomorricës në fshatin Rehovë në rrethin e Skraparit.
Nuk dihet nëse gruaja është vetëhedhur në përrua apo e ka marrë rrjedha e tij në përpjekje për të kaluar në anën tjetër. Edhe pse ngjarja ka ndodhur 24-orë më parë, Drejtoria Vendore e Policisë Berat nuk ka dhënë asnjë informacionin zyrtar për këtë ngjarje deri pak minuta më parë, e detyruar nga publikimi i lajmit në rrjetet sociale nga kryetari i PD.
Sipas policisë, gruaja rezulton me probleme të shëndetit mendor dhe kishte kërcënuar disa herë se do të mbytej në lumë. Mbi trupin e viktimës Sheqere Llahi është kryer edhe autopsia mjeko-ligjore, që nuk ka konstatuar shenja dhune.Viktima ishte banuese në fshatin Gjerbës në Skrapar dhe pas largimit të saj nga banesa, bashkëshorti ka kryer menjëherë denoncimin në Komisariatin e Policisë Skrapar por as ky informacion nuk është bërë publik nga policia, që tashmë deklaron se grupi hetimor po punon për sqarimin e plotë të rrethanave të ngjarjes.
Njoftimi i policisë:
Skrapar
Më datë 21.01.2023, në fshatin Gjerbës, Skrapar, në ujërat e lumit në fshatin Rehovë, Skrapar, dyshohet se është vetëmbytur në ujë, shtetasja Sh.Ll., 55 vjeçe, banuese në fshatin Rehovë, Skrapar.
Trupi i pajetë i 55-vjeçares është nxjerrë nga uji, dhe nga këqyrja paraprake e trupit të viktimës, nuk janë konstatuar shenja dhune.
Për shtetasen Sh.Ll., më datë 21.01.2023, ka njoftuar bashkëshorti i saj se është larguar nga banesa. Nga deklarimet e familjarëve shtetasja Sh.Ll., prej disa kohësh kishte shfaqur shenja depresioni, dhe në vazhdimësi ishte shprehur se do të mbytej në lumë.
Grupi hetimor po punon për sqarimin e plotë të rrethanave të ngjarjes.
Materialet i kaluan Prokurorisë pranë Gjykatës së Shkallës së Parë Berat, për veprime të mëtejshme.