Skandali i korrupsionit: Shefja i Parlamentit të BE zotohet se do të rishikojnë ligjet dhe rregullat

Parlamenti Evropian do të shqyrtojë udhëtimet e padeklaruara nga ligjvënësit dhe ato pjesë të legjislacionit që mund të jenë ndikuar në mënyrë të padrejtë si rezultat i skemës së dyshuar të favoreve, e cila ka shkaktuar një stuhi politike në të gjithë Brukselin dhe më gjerë, tha presidentja Roberta Metsola.

"Ne po shqyrtojmë gjithçka," tha Metsola për Euroneës të enjten pasdite.

"Ne po shqyrtojmë udhëtimet që janë miratuar, po shqyrtojmë udhëtimet që nuk janë deklaruar. Ne po shikojmë procesin e paraqitjes së amendamenteve, të afateve kohore, mënyrën se si negociohen rezolutat."

Hetimi i nisur nga autoritetet belge ka hedhur dritë mbi punën legjislative në të kaluarën,  përfshirë një votim të komisionit në fillim të dhjetorit që miratoi liberalizimin e vizave për Katarin dhe Kuvajtin, si dhe një sërë vizitash me pagesë të ligjvënësve të shumtë evropianë në rajonin e Gjirit.

Këmbanat e alarmit në "sferat e mundshme të ndikimit", vuri në dukje Metsola, "duhet të fillojnë të bien më herët".

“Ne gjithashtu duhet të jemi (më shumë) të vetëdijshëm”, tha presidentja. "Dhe kjo do t'u them të gjithë anëtarëve (të Parlamentit Evropian) dhe anëtarëve të stafit: nëse shohin diçka që nuk është e drejtë, diçka duhet thënë dhe diçka duhet bërë."

Pothuajse një muaj që kur shpërtheu skandali i korrupsionit, Brukseli vazhdon të përballet me valët tronditëse nga lobimi i paligjshëm i dyshuar i kryer nga Katari në lidhje me një rrjet prej të paktën katër individësh, përfshirë eurodeputeten greke Eva Kaili dhe bashkëshortin Francesco Giorgi.

Zbulimet e fundit e kanë zgjeruar në mënyrë të konsiderueshme fushën e hetimit, duke përfshirë potencialisht dy eurodeputetë të tjerë nga grupi socialist – Marc Tarabella dhe Andrea Cozzolino – si dhe zyrtarë të inteligjencës dhe diplomatë nga Maroku.

Si Katari ashtu edhe Maroku i kanë kundërshtuar fuqishëm pretendimet.

Një tjetër eurodeputete socialiste, Maria Arena, e cila nuk është akuzuar dhe as arrestuar, dha dorëheqjen këtë javë nga posti i saj si kryetare e nënkomisionit parlamentar për të drejtat e njeriut (DROI).

Të arrestuarit, Kaili, Tarabella, Cozzolino dhe Arena nuk pranojnë se kanë kryer shkelje ligji.

Me kthesa të reja që shfaqen pothuajse çdo ditë, Roberta Metsola ka nisur atë që ajo e quan një proces reformash "të shpejtë" për të rivendosur besimin dhe për të goditur sjelljen e keqe.

"Në thelb, (për të) rifutur konceptin e llogaridhënies, integritetit dhe pavarësisë," shpjegoi Metsola. “Ne mund të jemi krenarë për punën tonë, por mund të bëjmë dhe më mirë”.

Shefja e parlamentit prezantoi të enjten një projekt-paketë të parë reformash, të parë nga Euroneës, me gjithsej 14 propozime, të tilla si një periudhë ftohjeje për ish-deputetët gjatë së cilës ata nuk do të jenë në gjendje të punësohen si lobistë, ndalimi i grupeve jozyrtare të miqësisë, publikimi i detyrueshëm i të gjitha takimeve të planifikuara, rregulla të reja të hyrjes në ambientet e parlamentit dhe deklarata më të detajuara për konfliktin e interesave dhe financat personale.

"Doja të bashkoja të gjitha masat e mundshme, por ato nuk janë shteruese në mënyrë që të mund të përmirësohen më mirë," tha Metsola për Euroneës. "Çfarëdo që duhet bërë do të bëhet. Unë kam besim në këtë."

Transparency International BE dhe Corporate Europe Observatory, dy organizata të shoqërisë civile që monitorojnë lobimin në BE, i mirëpritën reformat e propozuara si një hap të parë "të vonuar" dhe "premtues", por kritikuan faktin se ato mbështeten në "vetëzbatimin" dhe "vetë-policimin" nga vetë eurodeputetët.

"Ne kemi nevojë për mbikëqyrje të pavarur, të jashtme. Shumë përgjegjësi u jepen asistentëve parlamentarë," tha në një deklaratë Michiel van Hulten, Drejtor i Transparency International BE.

E pyetur për kritikat, Metsola mbrojti paketën e saj dhe tha se kishte marrë një "mandat unanim" nga të gjitha grupet politike për të ecur përpara me propozimet e saj, të cilat mund të çojnë në ndryshim "të menjëhershëm".

Presidentja, e cila në asnjë moment nuk përmendi as Kailin dhe as Katarin me emër, pranoi mungesën e respektimit të rregullave ekzistuese – në vend të mungesës së rregullave – që hodhi themelet për skandalin e korrupsionit.