Koreja e Veriut mohon pretendimet se ka furnizuar me municion Rusisë

Ministria e Jashtme e Koresë së Veriut ka mohuar pretendimet se ka furnizuar me municion Rusisë.

Gazeta japoneze Tokyo Shimbun raportoi se muajin e kaluar Koreja e Veriut dërgoi municione, përfshirë predha artilerie, në Rusi me hekurudhë dhe se dërgesat e tilla pritet të vazhdojnë.

Pheniani i quajti këto pretendime të pabaza dhe absurde, raporton Reuters.

Shtëpia e Bardhë njoftoi të enjten se Koreja e Veriut ka furnizuar me raketa kompaninë private ruse Wagner për të ndihmuar aktivitetet e saj në Ukrainë.

Pheniani tha se një gjë e tillë nuk ka ndodhur dhe se Uashingtoni po shkakton gjakderdhje dhe shkatërrim në Ukrainë duke furnizuar Kievin me armë vdekjeprurëse.