A na duhen tetë gota ujë çdo ditë - apo jo?

Të gjithë e kemi dëgjuar këshillën e vjetër për të pirë 8 gota ujë në ditë. 

Por nëse nuk e bëni këtë, mos u shqetësoni: kjo këshillë nuk është e njëjtë për të gjithë. 

Sipas një studimi të ri, të publikuar së fundmi në revistën prestigjioze shkencore ndërkombëtare Science, pirja e 8 gotave ujë në ditë është e panevojshme për shumicën e të rriturve të shëndetshëm. 

Këshilla nuk merr parasysh ujin që marrim nga ushqimi dhe pijet e tjera si kafeja dhe çaji. 

Hulumtimi zbuloi gjithashtu se nevojat për ujë ndryshojnë nga personi në person dhe varen nga një sërë faktorësh si mosha, gjinia, madhësia e trupit, nivelet e aktivitetit fizik dhe klima e zonës.

Për të parë se sa ujë na nevojitet vërtet ne njerëzit, studiuesit analizuan të dhënat e 5600 njerëzve të moshës  deri në 96 vjeç në 26 vende për 8 ditë. 

Pjesëmarrësit ishin njerëz nga të gjitha sferat shoqërore dhe profesionale të jetës, duke përfshirë fermerë, sportistë dhe jo sportistë, punonjës zyrash në Evropë dhe Shtetet e Bashkuara të Amerikës, si dhe njerëz nga shoqëritë bujqësore dhe të gjuetisë në Amerikën e Jugut dhe Afrikë.

Pjesëmarrësit u monitoruan duke përdorur një teknikë të besueshme, e cila përdor ujë të lidhur me gjurmues që lehtësojnë monitorimin e prodhimit të dioksidit të karbonit nga trupi, në mënyrë që të mund të merren matje të sakta të shpenzimeve ditore të energjisë së pjesëmarrësve. 

Teknika gjithashtu i lejon studiuesit të vlerësojnë se sa ujë prodhuan pjesëmarrësit nga metabolizmi, si dhe sasinë e saktë të ujit që ata konsumuan.

Kështu, studiuesit përcaktuan saktësisht se sa ujë humbën pjesëmarrësit dhe sa zëvendësuan çdo ditë. 

Ata zbuluan se cikli ditor i ujit të një personi përcaktohet kryesisht nga madhësia e trupit dhe niveli i yndyrës së trupit, i cili përmban më pak ujë se muskujt dhe organet e tjera. 

Meqenëse burrat priren të kenë trup më të madh dhe më pak yndyrë në trup në krahasim me gratë, ata në përgjithësi kanë nevojë për më shumë ujë në baza ditore. 

Hulumtimet kanë treguar gjithashtu se sa ujë na nevojitet ndryshon gjatë gjithë jetës. 

Në përgjithësi, nevojat për ujë arritën kulmin midis moshës 20 dhe 50 vjeç dhe më pas u ulën me ngadalësimin e metabolizmit. 

Kjo ka të ngjarë sepse sasia e ujit varet pjesërisht nga metabolizmi dhe sa kalori konsumohen. 

Në të vërtetë, e gjithë puna që bëjnë qelizat tona çdo ditë bazohet në ujin dhe raporti i sasisë së ujit që përdorim me numrin e kalorive që konsumojmë mbetet mjaft konstant gjatë gjithë jetës.

Studimi tregoi gjithashtu se dy faktorë të tjerë të rëndësishëmqë përcaktojnë nevojat për ujë janë klima e zonës së banimit dhe nëse dikush është i ulur. 

Njerëzit që jetojnë në klimat më të ngrohta dhe janë më aktivë fizikisht kanë nevojë për më shumë ujë. 

Madje, studimi zbuloi se njerëzit nga zonat më pak të zhvilluara të botës kanë nevoja më të larta për ujë në krahasim me njerëzit nga vendet e zhvilluara. 

Kjo është ndoshta sepse nëse dikush është në një vend më të varfër, ka të ngjarë të punojë jashtë çdo ditë dhe të ketë më pak akses në kontrollin e klimës. 

Gjithashtu, njerëzit në vendet më të varfra shpesh punojnë në punë që kërkojnë më shumë aktivitet fizik. 

Ndërsa bota bëhet më e ngrohtë, kjo ndoshta do të bëjë që nevojat tona për ujë të rriten në përgjithësi,

Pra, sa ujë duhet të pimë? 

Përgjigja e bazuar në këtë studim është e thjeshtë: të pimë ujë kur kemi etje, për sa kohë që monitorojmë dhe i kushtojmë vërtet rëndësi nevojave të trupit tonë për hidratim. 

Duhet t'i japim përparësi ujit dhe të përpiqemi të shmangim pijet me sheqer, të cilat mund të shkaktojnë probleme metabolike. 

Kafeja dhe çaji janë gjithashtu burime të mira hidratimi, megjithëse kafeina që ato përmbajnë mund të rrisë urinimin. 

Së fundi, duhet të kemi parasysh që ujin e marrim edhe nga ushqimi. 

Disa ushqime të pasura me ujë janë frutat, perimet, fasulet, kosi dhe supat.