Qyteti i dytë i Ukrainës, Kharkiv, pa energji pas sulmeve ruse

Qyteti i dytë i Ukrainës, Kharkiv, mbeti për orë të tëra pa energji pasi vala e fundit e sulmeve ruse goditi stacionet e energjisë në të gjithë vendin.

Zyrtarët vendorë thanë se deri në nëntë objekte energjetike u goditën pasi forcat ruse hodhën 76 raketa dhe kryen sulme me dronë të premten.

Kryetari i bashkisë së Kharkiv tha se qyteti pësoi dëme "kolosale". Deri në mbrëmje, te 55% e banorëve  ishte kthyer energjia elektrike.

Një banore, Anastaisa, i tha BBC-së se sulmet filluan të premten në mëngjes.

“Në pak minuta, dritat filluan të fikeshin”, tha nëna e një fëmije dy muajsh. “Vetëm 10 sekonda më vonë, ne mbetëm pa energji.

“Për momentin nuk ka as ujë sepse stacionet e pompimit nuk mund të funksionojnë kur nuk ka energji në qytet, kështu që teknikisht tani kemi një qytet pa energji dhe ujë.

Në mbrëmje, Oleg Synegubov, kreu i administratës rajonale të Kharkiv, tha se furnizimet me energji elektrike ishin rikthyer për 55% të banorëve të qytetit dhe 85% të atyre që jetojnë në rajonin veri-lindor. Ai shtoi se punonjësit e sektorit të energjisë po punonin për të rivendosur energjinë e plotë deri në mesnatë.

Megjithatë, operatori i rrjetit energjetik të Ukrainës, Ukrenergo, paralajmëroi se shkalla e dëmit mund të nënkuptojë se do të duhet më shumë kohë për të rikthyer furnizimet.

Operatori tha në një deklaratë se sistemi energjetik kishte humbur më shumë se gjysmën e kapacitetit të tij për shkak të goditjeve të fundit, duke shtuar se përparësi do t'i jepet "infrastrukturës bazë - spitaleve, objekteve të furnizimit me ujë, objekteve të furnizimit me ngrohje, impianteve të trajtimit të ujërave të zeza".

Këshilltari i Ministrisë së Mbrojtjes, Yuriy Sak, i tha BBC-së se shërbimet e urgjencës po punonin për të rivendosur furnizimin me energji elektrike, por situata ishte "ende e vështirë". Sulmet e shpeshta të Rusisë nënkuptojnë se riparimi i dëmit po bëhet më i vështirë.

Diku tjetër, tre persona u vranë dhe 13 të tjerë u plagosën kur një ndërtesë banimi u godit në Kryvyi Rih dhe një i tretë vdiq në Kherson. Në kryeqytet, Kiev, metroja e qytetit mbeti në vend.

Alarmi u ngrit në të gjithë Ukrainën të premten dhe komandanti i përgjithshëm, gjenerali Valeriy Zaluzhny tha se mbrojtja ajrore kishte kapur 60 nga 76 raketat e lëshuara.

Zyrtarët e qytetit të Kievit thanë se rreth 40 raketa ishin lëshuar vetëm në kryeqytet - një nga breshëritë më të mëdha që nga pushtimi i Rusisë më 24 shkurt. Tridhjetë e shtatë u rrëzuan nga mbrojtja ajrore, shtuan zyrtarët.