‘Serbët kanë hyrë në Istog’/ Bekë Berisha ngre alarmin: Të shtohen urgjentisht patrullimet në kufi...
Kryetari i Komisionit për Çështje të Sigurisë dhe Mbrojtjes, Bekë Berisha ka ngritur alarmin duke thënë se situata në veri të vendit është shumë e tensionuar dhe se siguria e shtetit po cenohet nga forcat e xhandarmërisë serbe përmes pikave të tjera kufitare.
Berisha e ka ngritur alarmin në një konferencë për media, ku sipas tij qeveria e Kosovës po mundohet të mbajë situatën e relaksuar sikur të mos kishte ndodhur asgjë, në një kohë kur situata është shumë e tensionuar jo vetëm në veri të vendit por përgjatë 360 km që e ndajnë Kosovën me Serbinë.
Ai ka përmendur raportimet në media ditë më parë ku është përfolur se forcat serbe kanë hyrë në rajonin e Istogut, që sipas Berishës kjo tregon që qeveria është e dobët dhe e ka mendjen vetëm në veri të vendit duke lënë anash pikat e tjera kufitare me Serbinë.
Berisha: Qeveria e Kosovës po e mban situatën kinse të relaksuar sikur të mos kishte ndodhur asgjë. U siguroj dhe e di saktë çka po flas, situata në veri është shumë e tensionuar por jo vetëm në veri, pro nuk i përmenda pahiri edhe 360 kilometra që na ndajnë me Serbinë e që sovraniteti, integriteti i vendit tonë shkelet për çdo ditë, nga forcat e xhandarmërisë serbe”, ka thënë Berisha.
Brenda territorit të Kosovës para disa ditësh kanë cenuar dhe po cenojnë sigurinë e shtetit tonë (forcat serbe). Kjo tregon të vërtetën që kemi një qeveri të dobët në ruajtjen e sigurisë së vendit pasi vëmendja politike dhe qeveritare është shpërngulur vetëm në pikat kufitare në veri dhe në marrëveshjen finale me Serbinë, ndërsa kjo ka bërë që forcat serbe të hyjnë brenda territorit të Kosovës në shumë pika të tjera.
Dhe kjo është shkelje e drejtpërdrejt e sovranitetit tonë shtetëror. Nga këtu ftoj organet e rendit, Ministrinë e Punëve të Brendshme dhe institucionet përkatëse që të zbardhin rastin dhe detajet e kësaj ngjarje. Urgjentisht të shtohen patrullimet rreth vijës kufitare me Serbinë e cila është diku 360 kilometra vijë ndarëse në mes dy vendeve.