Ukraina: Nuk do të negociojmë derisa Rusia të tërheqë të gjithë trupat, përfshirë në Krime
Ukraina ka deklaruar sërish se nuk do të negociojë derisa të gjitha trupat ruse të largohen nga territori i saj, përfshirë Krimenë. sipas The Guardian.
Ukraina tha se vendimi i saj për sa i përket negociatave me Rusinë nuk kishte ndryshuar dhe se nuk po i kërkohet të negociojë nga aleatët e saj, pas raporteve nga Washington Post se aleati dhe mbështetësi kryesor i saj, SHBA, i kishte kërkuar Kievit të tregojë se është i hapur për negociata.
Të hënën gazeta italiane La Republicca tha se aleatët e NATO-s të Ukrainës thuhet se parashikojnë fillimin e negociatave pasi Ukraina të rimarrë rajonin Kherson.
Këshilltari presidencial ukrainas, Mykhailo Podalyak, tha për Radio Svoboda, se Ukraina do të negociojë me Rusinë vetëm pasi trupat ruse të jenë tërhequr nga i gjithë territori i Ukrainës, përfshirë ato që ajo pushtoi në 2014.
Podalyak tha se SHBA po e trajton Ukrainën si të barabartë dhe nuk ka asnjë detyrim. Ai tha se Ukraina po fiton dhe për këtë arsye të ulesh në tryezën e bisedimeve tani do të ishte “marrëzi”.
Podalyak tha se Rusia i ka ofruar Ukrainës vetëm ultimatume dhe Ukraina beson se çdo armëpushim i krijuar nga këto ultimatume do të jetë i përkohshëm. Ai tha se Rusia thjesht do të përdorë një armëpushim për të riarmatosur dhe modernizuar ushtrinë e saj.
Për SHBA-në, tha Podalyak, është “jashtëzakonisht e dobishme” që Ukraina të fitojë luftën, së pari, sepse kjo do t’u sinjalizojë liderëve të tjerë autoritarë se nëse ata sulmojnë një vend tjetër, ligji ndërkombëtar do të respektohet, dhe së dyti, sepse SHBA dhe aleatët e saj kanë investuar shumë për ta lënë Rusinë që të fitojë.
“Nëse Ukraina nuk e fiton luftën atëherë pavarësisht ndihmës së madhe dhe të fuqishme financiare, ekonomike, ushtarake dhe këshilluese nga vendet e NATO-s, mbi të gjitha SHBA-ja, Rusia ka fituar. E kuptoni se çfarë do të vërtetohet në atë rast! Se ushtria e Rusisë është shumë më e mirë, Rusia me të vërtetë ka ‘ushtrinë e dytë në botë’ më të fuqishme dhe Rusia mund të diktojë kushtet.”
Kur u pyet nëse raportet e gazetave ishin të rreme, Podalyak pohoi se gazeta mund të marrë informacionin e tyre nga politikanë pro-rusë, megjithësë as nuk i hodhi poshtë raportet si të rreme./abcnews.al/