Irani pranon se i ka ofruar dronë Rusisë por para pushtimit të Ukrainës nga Moska
Qeveria iraniane pranoi për herë të parë sot se kishte dërguar një numër të kufizuar dronësh në Rusi në muajt para fillimit të pushtimit të saj në Ukrainë.
Deklarata e ministrit të Jashtëm të Iranit Hossein Amirabdollahian vjen pas mohimeve të mëparshme nga Teherani se kishte furnizuar Rusinë me armë për përdorim në Ukrainë, duke thënë se "nuk e ka bërë dhe nuk do ta bëjë këtë".
Amirabdollahian nuk tha nëse dronët që u furnizuan në Moskë ishin ato që mbanin eksploziv.
“Disa vende perëndimore e kanë akuzuar Iranin se po ndihmon luftën në Ukrainë duke i ofruar Rusisë dronë dhe raketa. Pjesa në lidhje me raketat është krejtësisht e gabuar. Pjesa për dronët është e saktë, ne i siguruam Rusisë një numër të kufizuar dronësh në muajt para fillimit të luftës në Ukrainë”, u tha Amirabdollahian gazetarëve në Teheran.
Dronët vetë-shpërthyes kanë luajtur një rol të rëndësishëm në konflikt që kur Rusia nisi pushtimin e saj në fund të shkurtit.
Ata janë në gjendje të qarkullojnë për ca kohë në një zonë të identifikuar si një objektiv i mundshëm dhe të godasin vetëm pasi të identifikohet një mjet armik.
Rusia ka nisur një seri sulmesh me dronë në të gjithë Ukrainën javët e fundit, duke goditur infrastrukturën jetësore civile dhe duke mbjellë terror në qytetet ukrainase larg vijës së parë të luftës.
Zyrtarët ukrainas thanë javën e kaluar se kishin rrëzuar më shumë se 300 dronë iranianë.
Zyrtarët nga një vend perëndimor që monitoron nga afër programin e armëve të Iranit i thanë CNN se Irani po përgatitet të dërgojë më shumë drone sulmuese , së bashku me raketa balistike me rreze të shkurtër veprimi, në Rusi për t'i përdorur në luftë kundër Ukrainës.
Dërgesa e fundit e armëve nga Irani në Rusi përfshinte rreth 450 dronë, thanë zyrtarët, të cilët rusët i kanë përdorur tashmë për efekt vdekjeprurës në Ukrainë.