Elbasan, sekuestrohen 400 mijë euro pasuri të trafikantit të drogës së dënuar në Norvegji
Policia dhe Prokuroria e Elbasanit kanë vendosur sekuestro preventive ndaj pasurive të 34-vjeçarit Daniele (Oklid) Çela, 34 vjeç, banues në Elbasan, i cili është dënuar me 13 vjet burg në Norvegji për trafikim droge në kuadër të një grupi të strukturuar kriminal. Pasuritë e Çelës llogariten rreth 400 000 euro. Konkretisht u sekuestrua: një apartament, një lokal, garazhi i tij në lagjen "Visarjon Xhuvani" në Elbasan si dhe një ndërtesë dykatëshe, në Peqin.
Në njoftimim zyrtar të Policisë së Shtetit thuhet:
Specialistët e Seksionit për Hetimin e Krimeve Ekonomiko-Financiare të DVP Elbasan, në bashkëpunim me Prokurorinë e Rrethit Gjyqësor Elbasan, si rezultat i punës gjurmuese dhe hetimore të kryer për evidentimin dhe sekuestrimin e pasurive të përfituara në mënyrë të paligjshme që kanë si burim veprimtari të ndryshme kriminale, finalizuan operacionin policor të koduar “Fasada 2”.
Si rezultat i këtij operacioni u bë ekzekutimi i vendimit të Gjykatës së Shkallës së Parë Elbasan, e cila bazuar në provat e grumbulluara gjatë hetimeve të kryera nga Policia dhe Prokuroria, ka vendosur sekuestro preventive ndaj pasurive të shtetasit Daniele (Oklid) Çela, 34 vjeç, banues në Elbasan. Ky shtetas është dënuar me 13 vjet burgim, në Norvegji, si autor i tafikimit të lëndëve narkotike, në kuadër të një grupi të strukturuar kriminal, me aktivitet në këtë shtet.
Në zbatim të vendimit të gjykatës u bë i mundur sekuestrimi i pasurive të ndryshme të 34-vjeçarit, me vlerë rreth 400 000 euro, konkretisht janë sekuestruar: një apartament, një biznes (lokal) dhe garazhi i tij, në lagjen "Visarjon Xhuvani", Elbasan dhe një ndërtesë dykatëshe, në Peqin.
Nën drejtimin e Prokurorisë, vijon puna për të zbuluar asete të tjera të përfituara nga veprimtari kriminale, që ky shtetas dhe familjarët e tij mund t’i kenë regjistruar në emër të personave të tjerë. Materialet i kaluan Prokurorisë pranë Gjykatës së Rrethit Gjyqësor Elbasan, për veprime të mëtejshme.