Koteci pa leje/ E moshuara endet gjykatave sikur të kishte ngritur pallat

Lefkotheia Karasa, 82-vjeçarja nga fshati Nartë i Vlorës, po përballet me drejtësinë, nën akuzë për ndërtimin e një koteci pulash pa leje. Një ditë më parë e moshuara u paraqit në seancën e radhës gjyqësore, si të kishte ndërtuar një pallat 10-katësh në qendër të Vlorës e jo një kotec pulash. Gjykata ka kërkuar që me datën 25 tetor të japë konkluzione për dënimin e të moshuarës Lefkotheia Karasa.

Lefkotheia Karasa jeton e vetme në një shtëpi dykatëshe në Nartë të Vlorës, ndërsa djemtë janë në emigracion. Rasti i shoqërimit të 82-vjeçares në komisariat për ndërtim pa leje, u bë publik rreth një muaj më parë, ndërsa me lot në sy ajo tha se e kishte gjetur halli në pronën e vet.

Para dy vitesh, tregoi ajo, i shembën kasollen e bagëtive dhe nisi ndërtimin e një kasolleje pak më të madhe me mure. Këtu lindi konflikti me fqinjën që e denoncoi në polici.

“Problemi është se më ra halli në pronën time, në tokën time që ma ka lënë vjehrri. Shtëpinë e kanë ndërtuar djemtë me punën në Greqi. Dy vite që është bërë dhe ka kushtuar shumë. Atje kishim një kasolle dhe duam ta bëjmë të madhe. Kotec për pula a ndonjë tjetër, çfarë të bëjmë duhet ajo...(ndërtesa). Asgjë s'i kam prishur asaj (komshies) ajo më ka prishur mua gardhin. Erdhi policia më mori mua me forcë. A ju kanë thënë për ta prishur? JO! Ne e kemi në tokën tonë (qan)”, tha Lefkotheia Karasa.

Prokuroria ka ngritur akuzën ndërtim pa leje ndaj 82-vjecares Lefkotheia Karasa. Referuar Kodit Penal, "ndërtimi i paligjshëm i një objekti në tokën e vet" dënohet me gjobë ose 1 vit burgim.