Donald Trump nuk iu përgjigjet pyetjeve të prokurorëve

Ish-presidenti amerikan, Donald Trump refuzoi t’u përgjigjej pyetjeve të hetuesve në zyrën e Prokurorit të Përgjithshëm të New Yorkut të mërkurën, duke përmendur të drejtën e shfrytëzimit të Amendamentit të Pestë kundër vetë-inkriminimit në lidhje me hetimin shumëvjeçar të mashtrimeve me bizneset e tij.

Në një deklaratë të publikuar në rrjetin e tij social pasi mbërriti për t’u marrë në pyetje, Trump e quajti hetimin e James “një ekspeditë peshkimi hakmarrëse dhe egoiste” që ai pretendon se është i motivuar politikisht.

“Rrjedhimisht, nën këshillën e avokatit tim dhe për të gjitha arsyet e mësipërme, nuk pranova t’u përgjigjem pyetjeve në bazë të të drejtave dhe privilegjeve që i jepen çdo qytetari sipas Kushtetutës së Shteteve të Bashkuara”, tha ai.

Prokurorja e Përgjithshme e New Yorkut, Letitia James, ka kërkuar depozitimin për më shumë se gjysmë viti, ndërsa Trump dhe dy nga fëmijët e tij, Donald Trump Jr. dhe Ivanka Trump, kundërshtuan thirrjet e gjykatave të New Yorkut. Ata përfundimisht u urdhëruan të ulen për tu pyetur dhe në fillim të këtij muaji Trump Jr dhe Ivanka Trump u morën në pyetje.

Avokatët e zyrës së James kanë thënë në gjykatë se hetimi i tyre ka mbledhur prova se Trump dhe kompania e tij kanë përdorur “pasqyra financiare mashtruese”, duke fryrë vlerësimet e aktiveve ndërsa kërkonin kredi dhe mbulim sigurimesh dhe duke ulur vlerën e tyre për të ulur detyrimin tatimor.

Trump dhe kompania kanë mohuar vazhdimisht të gjitha akuzat për keqbërje.

Avokatët e zyrës së James kanë treguar gjatë seancave të shumta gjyqësore këtë pranverë dhe verë se hetimi është afër përfundimit.

Marrja në pyetje e ish-presidentit vjen në një kohë kur FBI hyri të hënën në shtëpinë e tij në Florida, Mar-a-Lago, duke marrë dokumente si pjesë e një hetimi për trajtimin e materialeve të klasifikuara nga Trump.

Një juri e madhe federale që heton trazirat e 6 janarit 2021, në Kapitol po shqyrton komunikimet midis disa prej aleatëve më të ngushtë të Trumpit dhe të një gjykatësi në Georgia. 

BREAKING: Donald Trump says he refused to answer questions in a New York fraud investigation, citing the Fifth Amendment. https://t.co/LzVLF2pO5P

— CBS News (@CBSNews) August 10, 2022