VIDEO-SYRI TV/ Presidenti i ri, Balla: Një President si Meta, zgjedhje e gabuar...
Partia Socialiste po hedh poshtë mundësinë e zgjedhjes së një Presidenti nga radhët e opozitës. Mesazhet që dha kreut i Grupit parlamentar socialist, Taulant Balla dhe Sekretari i Përgjithshëm, Damian Gjiknuri, ishin se PS-ja i ka votat për ta zgjedhur e vetme Presidentin në rast se konsensusi dështon.
Nga SYRI TV
Megjithëse insiston se po bën përpjekje për të gjetur një emër konsensual, për kreun e ri të shtetit, Partia Socialiste me gjasë nuk do t’i japë votat për një President që vjen nga radhët e opozitës.
Kjo stepje e mazhorancës për të votuar një emër nga radhët e opozitës, sipas kreut të Grupit parlamentar të PS-së, Taulant Ballës, bëhet për të shmangur një President të ngjashëm me Ilir Metën.
Për zgjedhjen e Presidenti të ri ka folur edhe Sekretari i Përgjithshëm i PS-së.
Nga Elbasani, Damian Gjiknuri deklaroi se është herët për të folur për një emër, për shkak të negociatave por theksoi se në rast se konsensusi dështon, PS do ta zgjedhë e vetme kreun e shtetit.
Konferenca e Kryetarëve do të mblidhet më datë 10 maj për të çelur zyrtarisht procesin e zgjedhjes së kreut të shtetit dhe për të thirrur më 16 maj, seancën plenare për raundin e parë.
Deri më datë 15 maj, palët kanë kohë për të paraqitur emrin e tyre për kandidatë potenciale, që duhet të mbështetet nga jo me pas se 20 deputetë.