Presidenti serb Aleksandër Vuçiq akuzon Ukrainën për lajme të rreme

Presidenti serb Aleksandër Vuçiq ka akuzuar Ukrainën dhe një shtet anëtar të bashkimit Europian, të cilin ai nuk e përmendi, se qëndronin pas një sërë paralajmërimesh të rreme si vendosja e bombave në avionët e pasagjerëve të Air Serbia.

''Pas pushtimit rus të Ukrainës më 24 shkurt, pothuajse pesëmbëdhjetë avionë të kompanisë u detyruan të kthehen në Beograd ose Moskë për shkak të kërcënimeve me bombë. Aeroporti në kryeqytetin serb është dashur të evakuohet të paktën tre herë. Kështu bëjnë shërbimet e huaja (inteligjencës) të dy vendeve. Njëri është një vend anëtar i BE-së, tjetri është Ukraina”, tha Vuçiç, pa dhënë asnjë provë për të mbështetur pretendimin e tij.

Serbia, një vend që është pothuajse tërësisht i varur nga Rusia për furnizimet e saj me gaz dhe naftë, refuzoi të vendosë sanksione dhe vazhdon të kryejë fluturime të rregullta drejt dhe nga Moska.

 Aleksandar Vuçiq theksoi se fluturimet do të vazhdojnë “për arsye parimore. 

''Ne po vazhdojmë këto fluturime mbi baza parimore sepse duam të tregojmë se jemi një vend i lirë që merr vendime në mënyrë sovrane. Askush nuk do të vendosë në emrin tonë nëse ne anulojmë fluturimet”, tha presidenti serb. 

Megjithatë, në javët e fundit, Beogradi ka votuar tre herë në favor të rezolutave të Asamblesë së Përgjithshme të OKB-së që dënojnë pushtimin ushtarak rus të Ukrainës dhe shënojnë pezullimin e pjesëmarrjes së Moskës në Këshillin e OKB-së për të Drejtat e Njeriut.