Spastrimi i madh/ Putini ‘arreston edhe njeriun që shpiku Putinizmin’
Personi që thuhet se ‘shpiku Putinizmin’ është arrestuar në Rusi dhe është vendosur në arrest shtëpiak.
Sipas Daily Mail, nëse konfirmohet arrestimi i Vladislav Surkov, atëherë kjo tregon se Vladimir Putini ka nisur të godasë edhe rrethin e tij të ngushtë.
Disa raportime të pakonfirmuara thonë se ideologu i Putinit është arrestuar në kuadër të një spastrimi të madh, gjatë të cilit janë arrestuar të paktën 150 agjentë të shërbimit sekret FSB.
Rasti në fjalë mendohet se ka lidhje me një skemë zhvatje prej 5 miliardë dollarësh, që shërbimi sekret i kishte në dispozicion për të krijuar një rrjet të fshehtë të inteligjencës në Ukrainë.
Surkov shihet si një person kyç për suksesin afatgjatë në zgjedhje të Putinit.
Ai ishte personi që e inkurajonte të besonte se Ukraina nuk është një shtet i vërtetë.
Përpara se të niste pushtimi, ai kishte bërë thirrje që të aneksoheshin Ukraina, Bjellorusia dhe shtetet Baltike.