Ndeshjet e kthimit në Champions/ Reali me një këmbë në gjysmëfinale, Bayern me mision hakmarrjen

Dy skuadrat e para që do të luajnë në gjysmëfinale të Ligës së Kampionëve do të mësohen mbrëmjen e sotme pasi luhen dy nga katër duelet çerekfinale të kompeticionit më elitar të futbollit në Evropë.

Pas një fitoreje të madhe 3-1 në Londër kundër Chelsea, Real Madrid dhe gjithashtu klubi më i trofeshëm në historinë e Champions League duhet të mbrojë avantazhin në stadiumin e tyre Santiago Bernabeu dhe Klubi Mbretëror shpreson që Karim Benzema të luajë një tjetër ndeshje mbresëlënëse  dhe t’i sigurojë skuadrës së tij një vend në mesin e katër më të mirave në Evropë.

Në ndeshjen e parë Benzema shënoi një hat-trick duke i sjell fitoren Realit. Ishte ndeshja e dytë radhazi në Champions League për sulmuesin francez  në të cilën shënoi tre gola. Para kësaj, ju kujtojmë, ai përmbysi ndeshjen kundër PSG-së dhe e çoi Realin në çerekfinale (3-2).

Në fundjavë, Reali fitoi  kundër Getafes në shtëpi me rezultatin 2-0 dhe kështu vazhdoi rrugëtimin drejt titullit kampion të Spanjës, ndërsa Chelsea pas dy humbjeve radhazi në të gjitha kompeticionet shfryu zemërimin ndaj Southampton dhe fitoi me rezultatin 6-0.

Duket qartë se të dyja skuadrat do të hedhin në fushë formacionet më të mira për t'u kualifikuar në gjysmëfinale të Champions League. Por mund të presim një Chelsea paksa më ofensiv që do të kërkojë për golin që në minutat e para. Duke qenë se rregulli i golave ​​si mysafir nuk zbatohet më, bluve u duhet një fitore me të paktën dy gola diferencë për ta çuar sfidën në kohën shtesë.

Ancelotti nuk mund të llogarisë shërbimet e Hazard, Isco-s dhe Milita-so në këtë ndeshje, ndërsa për Blutë nuk do të luajnë Chilëell, Hudson-Odoi dhe Lukaku.

Bayerni dhe Villarreali do të përballen në ndeshjen e dytë, dhe kjo ndeshje do të jetë veçanërisht interesante sepse “Nëndetësja e Verdhë” e mposhti gjigantin gjerman në ndeshjen e parë dhe në fund u penduan që fituan vetëm me një gol diferencë.

Villarreali ishte një skuadër shumë më e mirë se bavarezët, por nuk arriti të përfitonte nga  momenti i keq i kundërshtarit dhe të shënonte gola të tjerë, ndaj nuk ka dyshim se kampionët e Gjermanisë do të jenë shumë të motivuar për të përmbysur rezultatin, teksa do të përpiqen të shënojnë tre, katër ose pesë gola dhe kështu ta zgjidhin ndeshjen.

Nga ana tjetër, Unai Emery dhe Villarreali i tij nuk janë një skuadër naive dhe fakti që sezonin e kaluar fituan Europa League, ndërsa tani kanë arritur në çerekfinale të Champions League dhe kanë avantazhin 1-0, tregon se është e gatshme për të bërë gjëra të mëdha, por do të ishte e tepërt të thuhet se çfarë ambicie ka Bayern në këtë ndeshje dhe çfarë detyre i është vënë trajnerit Julian Nagelsmann.

Të dyja ndeshjet e mbrëmjes së sotme luhen duke filluar nga ora 21:00.