VIDEO/ Pritje emocionuese, Eriksen prezantohet para tifozëve të Brentford

Christian Eriksen u prezantua për tifozët e Brentfordit në një moment emocionues para përplasjes së tyre me Crystal Palace.

Eriksen nënshkroi për klubin anglez në janar, duke u rikthyer në Premier League pasi prishi kontratën me Interin.

Fantazisti pësoi arrest kardiak gjatë një ndeshje me Danimarkën në Euro 2020 dhe që atëherë nuk ka luajtur asnjë takim.

Eriksen është pajisur me një defibrilator kardioverter të implantueshëm (ICD), i cili e pengoi atë të luante në Itali, por rregullat e Premier League e lejojnë 29-vjeçarin të luajë.

Ai nuk është ende në gjendje për të luajtur, por Eriksen parakaloi nëpër stadiumin e Brentford, teksa u prit me ovacione të jashtëzakonshme nga tifozët e shtëpisë së tij të re përpara derbit të Londrës kundër Palace.

Ishte hera e parë që ylli i Danimarkës dilte në një stadium futbolli profesionist para një turme që nga ngjarja në Euro 2020.

Duke folur për talkSPORT të premten, Eriksen zbuloi se zemra e tij është 100 përqind e shëndetshme.

“Nëse do të kishte ndonjë shqetësim, nuk do të kthehesha më”, tha Eriksen.

"Nëse nuk do të isha plotësisht në formë dhe nuk do t'u besoja mjekëve, zemrës sime dhe ICD-së , atëherë nuk do të kthehesha, kështu që ndihem 100% i sigurt për t'u kthyer," përfundoi Eriksen.

Unbelievable scenes #Eriksen #BRECRY pic.twitter.com/JJcGGCIYaC

— Miles Dilworth (@MilesDilworth) February 12, 2022