Organizoi sulm ndaj vetes për të rritur famën, aktori shpallet fajtor nga gjykata

Aktori Jussie Smollett është shpallur fajtor pasi ka falsifikuar një krim për të rritur famën.

Juria e Çikagos, e cila diskutoi për më shumë se nëntë orë, e shpalli Smollett fajtor për pesë akuza për sjellje të çrregullt.

Ai u lirua nga akuza e gjashtë, pasi kishte gënjyer një detektiv në shkurt, disa javë pasi Smollett tha se ishte sulmuar.

Smollett i tha policisë se ai ishte sulmuar në një rrugë të errët nga dy burra të maskuar.

Sipas Smollett, sulmuesit e tij i vendosën një lak rreth qafës dhe derdhën kimikate mbi të, ndërsa bërtisnin sharje raciste dhe homofobe dhe shprehnin mbështetjen e tyre për Trumpin, raporton “Guardian”.

Por një muaj më vonë policia arrestoi vetë Smollett, duke e akuzuar aktorin se i kishte paguar dy vëllezërve 3,500 dollarë për të organizuar sulmin në një dredhi për të fituar simpatinë e publikut dhe për të rritur profilin e tij në biznes.

Prokurorët i kishin përshkruar provat kundër Smollett si “të shumta”, duke thënë se ajo që ai bëri në janar 2019 bëri që policia e Çikagos të shpenzonte në mënyrë të padrejtë sasi të mëdha burimesh dhe kohë.

Vëllezërit, Abimbola Osundario dhe Olabinjo Osundario, thanë se Smollett orkestroi mashtrimin, duke u thënë atyre që t’i vinin një lak rreth qafës dhe të bënin skenë të ashpër sulmi para një kamere vëzhgimi dhe se ai tha se donte që videoja e mashtrimit të bëhej publike përmes mediave sociale.