Premier League/ Manchester City nuk i ndahet Chelseat

Manchester City nuk i ndahet Chelsea-t, teksa pasditen e sotme ia ka dalë të triumfojë me rezultatin e pastër 3-0 ndaj Evertonit dhe të rikthehet në vendin e dytë me 26 pikë, tre më pak se londinezët që kryesojnë.

Sulmuesi anglez Raheem Sterling hapi serinë e golave në minutën e 44-t, duke çuar “citizens” në dhomat e zhveshjes me avantazhin e një goli, ndërsa në të 55-ën spanjolli Rodri lëshoi një silurë nga distanca, duke dërguar topin për herë të dytë në rrjetën e Jordan Pickford.

Portieri anglez u bë disa herë hero për Evertonin, megjithatë nuk mund të bënte asgjë në minutën e 86’ përballë Bernardo Silvës, i cili e mposhti për herë të tretë dhe vulosi rezultatin 3-0, që mban Manchester Cityn në vendin e dytë, me 26 pikë.