Situatë alarmante në Francë: Numri i të infektuarve rishtazi po rritet në mënyrë të pakontrolluar

Numri i infeksioneve të reja gjatë valës së pestë të epidemisë së koronavirusit në Francë po rritet me ritme alarmante, njoftoi sot qeveria franceze.

Numri i rasteve të reja me Covid-19 në baza ditore pothuajse është dyfishuar gjatë javës së kaluar, raporton gazeta britanike “Guardian”.

Mesatarja shtatëditore e rasteve të reja arriti në 17,153 dje, krahasuar me 9,458 një javë më parë, thanë autoritetet shëndetësore, duke shtuar se rritja ishte 81 për qind.

“Vala e pestë fillon me shpejtësinë e dritës”, tha zëdhënësi i qeverisë Gabriel Atal.

Rritja e fundit shtatëditore është tre herë më e lartë se rritja mesatare e rasteve të regjistruara në tre javët e mëparshme, gjë që tregon një përshpejtim eksponencial të infeksioneve.

Deri më tani, rritja e numrit të të infektuarve nuk ka sjellë një fluks masiv të pacientëve me Covid-19 drejt spitaleve.

Autoritetet besojnë se numri i vogël i pacientëve në kujdesin intensiv është rezultat i shkallës së lartë të vaksinimit në Francë, i cili sipas tyre është shumë efektiv kundër formave më të rrezikshme të Covid-19.

Spitalet raportuan dje se po trajtohen gjithsej 7,974 pacientë me Covid-19, nga të cilët 1,333 janë në terapi intensive.

Futja e kartave shëndetësore gjatë verës gjithashtu ndihmoi në mbajtjen nën kontroll të Covid-19, tha Atal.

Lejet shëndetësore që kërkohen për të hyrë në restorantet, kafenetë dhe shumë objekte kulturore franceze konfirmojnë se personi është vaksinuar plotësisht, është shëruar së fundmi nga Covid-19 ose është negativ për një test virusi.

Qeveria mban qëndrimin e saj se peshën e kufizimeve duhet ta mbajnë personat e pavaksinuar,  theksoi Atal.