EMRAT/ Plagosja me armë në Shkodër në muajin mars, arrestohet autori

Një plagosje me armë e regjistruar në Shkodër në mars të këtij viti, është zbardhur nga policia e ketij qyteti.

Nga DVP Shkodër u ndalua shtetasi në kërkim Elis Lekndrejaj, pasi më datë 21.03.2021 ka plagosur shtetasin Mikel Fusha.

Ja njoftimi i policisë:

DVP Shkodër

Specialistët për Hetimin e Krimit në Komisariatin DVP Shkodër bënë ndalimin e shtetasit E. L., 27 vjeç, banues në lagjen “Partizani”, Shkodër.

Këtij shtetasi, Gjykata e Shkallës së Parë Shkodër, më datë 23.03.2021, i ka caktuar masën e sigurimit personal në mungesë “Arrest në burg” për veprat penale "Vrasja me paramendim” e mbetur në tentativë dhe “Armëmbajtja pa leje”, pasi dyshohet si autori i ngjarjes së datës 21.03.2021, në lagjen “Mark Lula”, Shkodër, ku ka mbetur i plagosur me armë zjarri shtetasi M. F.

Materialet iu referuan Prokurorisë pranë Gjykatës së Shkallës së Parë Shkodër, për veprime të mëtejshme.