Basha i drejtohet me ironi, Paloka: Emrat që po denoncon çoji në Prokurori, mos na i trego këtu
Debate në mbledhjen e Kryesisë së PD ka patur edhe mes Lulzim Basha dhe kryetarit të Këshillit Kombëtar, Edi Paoka, pasi Basha propozoi mbledhjen e Kuvendit Kombëtar me 18 dhjetor.
Basha ka pyetur Edi Palokën me ironi se çfarë pune kanë me Partinë Demokratike Suel Çela dhe Aqif Rakipi, ndërsa Paloka i është kthyer duke i thënë t’i çojë në prokurori dhe jo t’ua tregojë atyre.
Gjatë fjalës së tij, Basha është shprehur se nëse plani i Berishës është për të sabotuar Partinë Demokratike në zgjedhje, atëherë ky është fundi.
Pjesë nga debati
Lulzim Basha: Kush më shpjegon çfarë pune ka Suel Cela, që mban peng kryetarët e grupseksioneve për të firmosur formularët? Çfarë pune ka Qifja me Kuvendin e PD? Po Tom Doshi? Kush a shpjegon?
Edi Paloka: Çoji në prokurori Kryetar, mos na i trego këtu.
Lulzim Basha: Jam aq i përgjegjshëm sa të mos fus prokurorinë në parti, por ajo që dua të them është se gjithçka mund të ishte shmangur, nëse Sali Berisha do të kishte mbajtur fjalën dhe të mos e kishte përfshirë PD ne konfliktin e tij personal me SHBA.
PD ka institucione, ka statut dhe nuk ka për të patur struktura paralele. Më 11 Dhjetor, mund të ketë tubim, por jo kuvend të PD. Paloka foli për mungesë vëmendje nga unë për masakrën zgjedhore.
Si i shërbehet kauzës së masakrës zgjedhore, kur të njëjtët persona janë thirrur, janë shtyrë apo u është shkelur syri nga Edi Rama për t’u përfshirë me formularët e PD? Nuk më dhatë asnjë përgjigje çfarë interesi ka Suel Çela? Po Qifja? Ça interesi ka Tom Doshi përveçse për të përçarë PD?
Nëse plani i “Foltores”, i Sali Berishës është t’i bëjë shantazh PD-së me sabotim të çfarëdo zgjedhjesh që kemi përpara, po ju them se e ka shumë gabim. Është një fund realisht i i dhimbshëm për përmasat e figurës së tij, e kontributit të tij jo thjesht për PD, por për Shqipërinë tij.
Shantazh PD-së se “po erdhën zgjedhjet, ne do t’ju dëmtojmë, që ju të mos arrini rezultat përballë Edi Ramës, ky është fundi. Uroj që të paktën këtë hap të mos e hedhë”!
Edi Paloka: Mos i dilni kundër vullnetit të anëtarësisë dhe firmave që janë mbledhur.