Zgjedhjet në FRPD, Basha sulmon Belind Këlliçin: Sajesa për interesa personale
Kryetari aktual i Partisë Demokratike, Lulzim Basha u përpoq ta justifikojë vendimin e tij hakmarrës për shpalljen e zgjedhjeve të organeve të FRPD, pavarësisht se statuti i PD nuk ia njeh këtë kompetencë. Basha sulmoi kreun e FRPD, Belind Këlliçin dhe u mundua të largojë vëmendjen nga kriza në PD përmes një tjetër nisme ligjore.
Nga SYRI TV.
Kryetari aktual i Partisë Demokratike, Lulzim Basha është përpjekur që ta justikojë vendimin e tij hakmarrës ndaj të rinjve të PD, duke thënë se po respekton procedurat e ndjekura për zgjedhjet e organeve të reja të FRPD. Por ai ka shmangur përgjigjen e drejtpërdrejtë ndaj pyetjeve të gazetarëve nëse ka të drejtë ta bëjë një gjë të tillë, duke marrë në konsideratë, faktin që FRPD është një organizatë partnere e PD dhe zgjedhjet nuk mund të shpallen nga kryedemokrati.
Më tej Lulzim Basha ka sulmuar kreun e Forumit Rinor, deputetin Belind Këlliçi, i cili një ditë më parë e quajti Nul, vendimin e Bashës dhe e lidhte me përkrahjen që të rinjtë demokratë po i japin Foltores së ish- kryeministrit Sali Berisha.
Për të larguar vëmendjen, nga zhvillimet dramatike dhe kriza e thellë që ka përfshirë forcën kryesore të opozitës, Lulzim Basha ka ndjekur traditën e javëve të fundit , duke paralajmëruar një tjetër nismë ligjore të PD, me propozime në ligjin anti-mafia, kundër oligarkisë.
I pyetur nëse Partia Demokratike është gati për zgjedhje të pjesshme lokale, Lulzim Basha tha se duhet të pritet vendimi i zbardhur i Gjykatës Kushtetuese, edhe pse Kushtetuesja i la në fuqi zgjedhjet e 30 Qershorit, të cilat u bojkotuan nga opozita.