VIDEO/ Opozita abstenon për marrëveshjen me Pfizer, Manastirliu: 3 milionë doza brenda vitit
Opozita abstenoi gjatë votimit të Aktit Normativ për Marrëveshjen me kompaninë PFIZER. Në mbledhjen e Komisionit të Ekonomisë, ministrja Manastriliu foli për shifrat e furnizimit me vaksina, ndërsa deputeti Erion Braçe propozoi kufizime për të pavaksinuarit.
Nga SYRI TV.
Opozita nuk kishte një qëndrim të qartë për Aktin Normativ të Marrëveshjes për furnizim me vaksinat Pfizer, prandaj abstenoi gjatë votimit në Komisionin e Ekonomisë.
Deputetë të Partisë Demokratike e argumentuan këtë votim me mungesën e kohës për të lexuar të gjithë kontratën.
E pranishme në mbledhjen e Komisonit të Ekonomisë, Ministrja e Shëndetësisë Ogerta Manastiliu deklaroi se deri në fund të vitit, numri i vaksinave të siguruara do të jetë 3 milionë. Nga ana tjetër, deputeti socialist Erion Braçe kërkoi nga qeveria që të vendosë kufizime për të gjithë qytetarët që nuk janë të vaksinuar.
Në përfundim të mbledhjes, opozita e zhvendosi aksionin te rritja e çmimit te bukës, duke kërkuar sërish dëgjesë me Autoritetin e Konkurrencës.
Partia Demokratike po përgatit një relacion që do ta dorëzojë në Kuvend lidhur me koston dhe propozimin për uljen e TVSH-së për produktet e shportës nga 20, në 6%.