Prindërit nisin të firmosin peticionin: Jo mësimit me turne në shkolla

Një peticion online ka nisur të firmoset nga prindërit për të kundërshtuar mësimin me turne. Në nisjen e vitit të ri shkollor, Ministria e Arsimit ka vendosur që të rikthejë mësimet me turne për shkak të pandemisë, por ky vendim ka nxitur reagimin e disa prindërve.

Sipas tyre fëmijët dhe adoleshentët janë më pak të riskuar nga pandemia dhe kërkojnë kthimin në normalitet.

Deri tani mbi 3200 prindër kanë firmosur online për kthimin e fëmijëve në shkolla me orë të plota dhe pa turne. Në vendin tonë janë mbi 300 shkolla që do ta zhvillojnë mësimin me turne.

Nisja e vitit të ri shkollor, bashkë me emocionet e rikthimit të nxënësve në banka, rëndon mbi buxhetin e një familje shqiptare.

Edhe pse librat për të gjithë nxënësit nga klasa e parë në të nëntën, si dhe ata të kategorive në nevojë në shkollat e mesme janë falas, shpenzimet nisin me prindërit që drejtohen në kancelari për të blerë mjetet e nevojshme shkollore për fëmijët e tyre.

Lapsat, fletoret, bojërat, letrat me ngjyrë, vizoret, dosjet dhe blloqet janë vetëm disa nga mjetet dhe materialet e domosdoshme për t’u blerë. Mesatarisht, kostoja e këtyre produkteve shkon në 4000 lekë për çdo fëmijë.

Këtyre shpenzimeve iu shtohen edhe çantat, çmimet e të cilave variojnë nga 1500 deri në 8500 lekë të reja. Të pashmangshme janë edhe kostot për blerjen e veshjeve dhe të këpucëve të reja.

Ndërsa një tjetër shpenzim ekstra vjen nga koronavirusi pasi prindërit duhet të bëjnë edhe një ndalesë në farmaci, ku marrin kryesisht maska dhe dezinfektues, në vlerën mesatare të 1000 lekëve.

Edhe pse shifra ndryshon nga buxheti personal i secilës familje, në bazë të çmimeve të tregut dhe atyre që deklarojnë prindërit, për të çuar një fëmijë në shkollë shpenzohen mesatarisht 17 000 lekë.