Vasili: Zgjedhjet e 25 prillit turp historik, drejtësia e kapur peng nga ‘Rilindja’

Nënkryetari i LSI-së Petrit Vasili, i ftuar në Syri Tv me moderatoren Megi Fagu, deklaroi se zgjedhjet e 25 prillit ishin turp historik.

Vasili thekson se drejtësia në vend është e kapur nga “Rilindja”.

“Zgjedhjet e 25 prillit ishin të manipuluara dhe të shëmtuara. Kishte shit-blerje votash gjatë zgjedhjesh. Më 25 prill kishim masakër elektorale. Mandati i tretë i Ramës është vazhdimësi e asaj që ai ka bërë më herët në maxhorancë. Kishte skandal, sepse shumë emigrantë nuk janë lejuar që të votojnë. Në Vlorë, për të vjedhur pronat, janë ndërruar drejtorët.

Sot kemi drejtësi të kapur. Nuk ka drejtësi, se nëse do kishte, autorët e masakrës së 25 prillit do ishin sot para drejtësisë. Edhe ekonomia është në gjendje të rëndë, teksa Shqipëria është në lavatriçe të parave të pastra, si dhe kemi ekonomi kriminale, teksa trafikantët kanë rrënuar shtresën e mesme dhe kanë bërë që të ikin nga vendi mijëra të rinj, pikërisht për këto shkaqe. Kjo qeveri ka program mizerabël. Jeta është zaptuar nga antiligji”, deklaroi Vasili.