VIDEO/ Betohet kabineti 'Rama 3', qeveria bën foton tradicionale para Kryeministrisë
Kabineti Rama 3 ka bërë betimin në Presidencë, duke marrë zyrtarisht detyrën, për 4 vitet e ardhshme. Betimi para Presidentin Meta zgjati 15 minuta, ndërsa në përfundim, kryeministri dhe ministrat përshkruan në këmbë, rrugën drejt kryeministrisë.
Nga SYRI TV.
Në orën 10 të mesditës, makina e Kryeministrit, kapërceu derën e Presidencës, për të çuar Edi Ramën, para betimit në Kushtetutë, duke marrë mandatin e trete, si Kryeministër i Shqipërisë.
Kabineti Rama 3 u betua me ngut, për më pak se 15 minuta, para Presidentit Ilir META, të cilin mazhoranca socialiste e shkarkoi disa muaj më parë. Të dy, u ritakuan serish, por pa trokitur gotat e kremtimit.
Duke ndjekur traditën, Kryeministri Rama dhe ministrat e qeverisë së tij, përshkruan në këmbë Bulevardin “Dëshmorët e Kombit” duke ndaluar, para godinës së Këshillit të Ministrave, për të fiksuar në foto, momentin kur qeveria nisi zyrtarisht maratonën 4-vjeçare.
Megjithëse i pari i qeverisë, Edi Rama zgjodhi të hynte i fundit në Kryeministri.
Sapo Kryeministri mbylli derën, për qeverinë e re shqiptare erdhën dhe mesazhet e para, të cilat, përveç urimit, kishin brenda edhe kujtesën për detyrat e rëndësishme që kabineti i Edi Ramës ka përpara.
Komisioneri për Zgjerimin në BE, Oliver Varhelyi, në mesazhin e urimit, i kujtoi Kryeministrit se pavarësisht shumicës në Kuvend, dialogu konstruktiv politik është çelës i fortë koordinimi për në Bashkimin Europian.
Ambasadorja Amerikane, Juri Kim, pak minuta pas betimit të qeverisë,e cilësoi historik mandatin e Partisë Socialiste, duke thënë se në nisjen zyrtare të këtij mandati, SHBA mezi pret të punojë intensivisht me Shqipërinë për të forcuar demokracinë, mbrojtjen dhe biznesin.
Kabineti i ri qeveritar
Zoti Edi Rama- Kryeministër;
Zoti Arben Ahmetaj – Zëvendëskryeministër dhe ministër i Shtetit për Rindërtimin dhe Programin e Reformave;
Zonja Olta Xhaçka – Ministër për Evropën dhe Punët e Jashtme;
Zoti Niko Peleshi – Ministër i Mbrojtjes;
Zoti Bledar Çuçi – Ministër i Brendshëm;
Zonja Delina Ibrahimaj- Ministër i Financave dhe Ekonomisë;
Zonja Belinda Balluku – Ministër i Infrastrukturës dhe Energjisë;
Zonja Evis Kushi – Ministër i Arsimit dhe Sportit;
Zoti Ulsi Manja – Ministër i Drejtësisë;
Zonja Elva Margariti – Ministër i Kulturës;
Zonja Frida Krifca – Ministër i Bujqësisë dhe Zhvillimit Rural;
Zonja Ogerta Manastirliu – Ministër i Shëndetësisë dhe Mbrojtjes Sociale;
Zonja Mirela Kumbaro Furxhi – Ministër i Turizmit dhe Mjedisit;
Zonja Elisa Spiropali – Ministër i Shtetit për Marrëdhëniet me Parlamentin;
Zonja Edona Bilali – Ministër i Shtetit për Mbrojtjen e Sipërmarrjes;
Zonja Bora Muzhaqi – Ministër i Shtetit për Rininë dhe Fëmijët;
Zonja Milva Ekonomi – Ministër i Shtetit për Standardet e Shërbimeve.