Ndaloi në servis se iu ça goma, grabitet gjykatësi italian në Durrës
Në mes të pikut të sezonit turistik, një gjykatës italian ka rënë pre e një grabitjeje në zonën e Golemit në Durrës.
Sipas raportimeve për mediat, gjyqtari e ka lënë makinën në një servis pasi gjatë rrugës i është çarë goma e makinës, e aty, i kanë vjedhur paratë e dokumentet.
Italiani, gjykatës në Bari, ndodhej me pushime në Shqipëri.
Ai e ka denoncuar ngjarjen në polici, ndërkohë që Policia po punon për identifikimin e autorëve të grabitjes.
Njoftimi i policisë:
Rreth orës 11:30, në vendin e quajtur “Mali i Robit”, një shtetas italian kallëzon se gjatë kohës që ka ndaluar pasi mjeti me të cilin po qarkullonte ka pësuar një difekt teknik, një shtetas ende i paidentifikuar i ka vjedhur çantën me sende personale dhe një shumë parash.
Nga ana e Policisë është bërë sekuestrimi i pamjeve filmike dhe po punohet për identifikimin dhe kapjen e autorit.