Përse Ilir Meta, nuk duhet të pranojë “dorëheqjen” e Armando Prengës si deputet
Edi Rama pasi e ka mbrojtur deri në fund Armando Prengën, duke përdorur turpshëm edhe KQZ-në sërish ka synuar që nga e gjithë kjo histori të dalë “pa u lagur”, duke e urdhëruar deputetin e tij kriminel që të japë dorëheqjen.
Përmbajtja e letrës së Prengës drejtuar kryetarit të Kuvendit, Ilir Meta, tregon edhe njëherë se ajo që ka bërë Rama me krimin duke e inflirtuar në politikë ka qenë jo vetëm e paramenduar, por edhe një strategji nga e cila nuk ka ndërmend të heqë dorë. Duke u gjendur përballë një rasti skandaloz vetëm pak orë përpara vendimit të KQZ, ai e ka urdhëruar deputetin e tij me 9 emra që të largohet vetë.
Por Ilir Meta, nëse i ka ngelur ndopak integritet moral dhe politik, nuk duhet ta pranojë këtë “dorëheqje”. Mandatin Armando Prengës duhet t`ja heqë KQZ-ja e Denar Bibës e cila në mënyrë të turpshme dhe absurde e mbrojti deri në fund, edhe pse mbi tavolinë kishte nga prokuroria një dosje voluminoze më bëmat e tij kriminale nëpër Europë. Pasi të mbarojë punë organi i akuzës, atëherë prokuroria duhet të veprojë urgjentisht duke i hedhur prangat.
“Sektori i “Dekriminalizimit” në Prokurorinë e Përgjithshme ka konstatuar se subjektit Armando Prenga i duhet ndërprerë mandati i deputetit, pasi rezulton që nuk ka deklaruar:
1.Një dënim të formës së prerë, dhënë nga Gjykata e Rrethit Gjyqësor Kurbin, për veprën penale të “Falsifikimit të dokumenteve”, me 450 000 lekë gjobë
2. Si edhe faktin që rezulton me precedentë penale në shtetin italian për vjedhje pasurish, falsifikime në përgjithësi, marrje të pasurisë së vjedhur, deklarata për identitet të rremë në vitet 1996-1997 në qytetin e Milanos. Këto të dhëna janë konfirmuar nga komunikimi zyrtar me autoritetet italiane”, thuhet në kërkesën zyrtare të organit të akuzës drejtuar KQZ-së.
Pra përveçse falsifikimit të dokumenteve duke mos deklaruar dënimin për një gjobë, Prenga i Ramës ka mbajtur 9 emra për ti shpëtuar drejtësisë italiane, kur ka drejtuar në qytetin e Milanos një bandë që grabiste banesa dhe merrej me trafik.
Tani ky individ pasi ka votuar Reformën në Drejtësi dhe shumë ligje të rëndësishme në funksion të oligrkëve të Ramës kërkon, që gjithë këtë ta mbulojë nëpërmjet një dorëheqje drejtuar Ilir Metës. Sipas tij, “ligji për dekriminalizimin në asnjë dispozitë të tij, nuk parashikon ndërprerjen e mandatit të të zgjedhurve për një dënim me gjobë, siç është rasti im, por për qetësinë time dhe të familjes sime, deklaroj si më sipër se heq dorë sot dhe gjithmonë nga mandati që zgjedhësit e mi dhe Kushtetuta më ka ngarkuar”.
Dhe pasi shkruan këto, pa pikë turpi, sulmon opozitën për shpifje të ulta politike.
Këtij lloj individi, nuk i duhet dhënë shansi që të largohet nga parlamenti, si i “vetëdorëhequr” dhe siç kërkon ta shpallë Rama, si viktimë të luftës politike. Ai duhet fshirë nga lista e ligjvënësve ashtu siç e parashikon ligji i dekriminalizimit me motivacionin. “si kriminel”. Pas kësaj, edhe prokuroria pa humbur asnjë sekondë të zbatojë edhe ajo ligjin dhe ti hedh prangat, fillimisht nën akuzën për fshehje dhe falsifikim të të kaluarës së tij kriminale, ashtu siç shkruhet e zeza mbi të bardhë në ligjin e Dekriminalizimit. Për të tjerat që ka bërë, kohën përpara e kanë…
SYRI.net