'Hiqjani trofetë'/ Shpërthen legjenda e futbollit: Më vjen neveri nga Man United dhe Liverpool
Legjenda e futbollit anglez dhe i Manchester United, Gary Neville, i acaruar nga ajo që po ndodh me SuperLeague dhe projektin e 12 klubeve për të ndërtuar një ligë të tyre, komentoi pak më parë drejtpërdrejt në Sky Sports UK:
“Unë kam qenë një tifoz i Manchester United për 40 vjet, por jam i neveritur…Dhe unë jam veçanërisht i neveritur nga Manchester United dhe Liverpool. Unë dua të them, Liverpool është klubi që ka sloganin Ju kurrë nuk do të ecni vetëm, ose Klubi i Popullit, dhe më pas Manchester United, krijuar nga njerëz të lindur dhe rritur rreth Old Trafford më shumë se 100 vjet më parë, dhe ata duan të hyjnë në një turne pa konkurs, nga i cili nuk mund të zbresësh…”.
“Ne duhet të rishikojmë fuqinë e futbollit në këtë vend, duke filluar me klubet që dominojnë dhe komandojnë Premier League, duke filluar me klubin tim, Manchester United.
Ajo që po shohim është koprracia e thjeshtë, asgjë tjetër. Pronarët e United, Liverpool, City apo Chelsea janë mashtrues, ata nuk kanë asnjë lidhje me futbollin në Angli.
Ky vend ka më shumë se 150 vjet histori futbolli, duke filluar me tifozët e këtyre klubeve të cilët për dekada me radhë kanë brohoritur dhe mbështetur ekipin e tyre në çdo situatë. Dhe janë ata që duhet të mbrohen…
I detyrohem shumë futbollit. Unë fitova me atë dhe ende fitoj para, pasi kam investuar dhe vazhdoj të investoj në të, kështu që nuk jam kundër parave që shkojnë në futboll, por më interesojnë vërtet parimet dhe etika e këtij sporti.
Nëse Leicester fiton Premier League, është e drejtë që ata të shkojnë në Champions League. Ky është një shembull, por është mënyra se si duhet të funksionojë, jo që skuadra si Tottenham, United ose Arsenal që nuk janë as në Champions League mund të marrin pjesë në një garë elitare…
Nëse ata njoftojnë se është nënshkruar një parakontratë ose para-marrëveshje, ndëshkoni ato klube.
Hiqni pikët, gjobitini, hiqni titujt që kanë fituar. Jepjani Premier League Fulham ose Burnley. Ose shpëtoni Fulham dhe ulni Manchester United, Liverpool dhe Arsenal të cilët janë tre skuadrat më historike dhe kanë tradhtuar tifozët e tyre…
Mjaft më me ata të gjithë, koha ka mbaruar. Na duhet një komision i jashtëm për të vlerësuar këta pronarë dhe për të vendosur rregull”.