Injorohet gazetari kosovar në Spanjë, nuk e lejojnë t'i bëjë pyetje Luis Enriques

Kosova përballet nesër me Spanjën në transfertë, në ndeshjen e vlefshme për kualifikueset e Kupës së Botës “Katar 2022”.

Një ditë përpara kësaj sfide, trajnerët e të dyja ekipeve respektive kanë mbajtur konferencë për media, ku janë pyetur nga gazetarët në lidhje me këtë takim.

Gazetari nga Kosova, Arlind Sadiku, përmes një postimi të bërë në rrjetin e tij social në Facebook ka njoftuar se nuk i është dhënë fjala qëllimisht kur po fliste Luis Enrique.

Më poshtë mund të lexoni postimin e plotë të tij:

“Isha në konferencën për media te Spanja dhe qëllimisht nuk mu dha fjala për pyetje. Kisha folur para konferencës me pres oficerin Pablo Garcia Cuervo, se kisha pyetje për trajnerin dhe ishte në dijeni. Kur përfundoi konferenca pasi i bën pyetjet nja 20 gazetarë spanjollë, e pyeta Cuervon pse nuk ma dha fjalën, më tha kështu: “Trajneri u përgjigj për ato që ke dashur ta pyesësh!”. Thash ku po e din ti çka kam dashtë me pyet?! Nejse. Ndërsa në konferencën tonë të Kosovës së dashur, menaxheri i ekipit tonë ua dha përparësinë krejt gazetarëve spanjollë me bë pyetje,e pasi e përfunduan ata, mu dha mu fjala. Që ka thënë ai plaku, çka me thonë bre.”