Bundesliga/ Dëmtimet dhe infektimet me COVID-19 sjellin pasoja, Bayern Munchen bie në Frankfurt

Bayerni i Mynihut u jep shpresë rivalëve për titullin e Bundesligës.

Skuadra bavareze u mund 2-1 nga Eintrachti i Frankfurtit në “Deutsche Bank Park”, ku ndjeu mungesat e shumta për arsye dëmtimesh dhe të infektimit me COVID-19.

Në pak më shumë se gjysmë ore lojë, Bayerni pësoi dy gola, të parin në minutën e 12-të me autor Kamadan, ndërsa atë të 2-0 në të 31-tën, nga këmbët e Younes.

Gjatë pjesës së dytë, kampionët në fuqi arritën ta tundnin rrjetën me të zakonshmin Lewandowski në minutën e 53-të, por saktësinë e sulmuesit polak nuk e kishte Kinsley Coman, që nuk arriti të shënonte në dy mundësi të mira që pati.

Kryesori bëri me shenjë nga pika e bardhë e penalltisë (në favor të vendësve), në minutën e 79-të, por pasi u konsultua me sistemin VAR ndryshoi vendim.

Asgjë nuk ndryshoi në minutat e mbetura, me Bayerni që regjistroi humbjen e tretë në Bundesligë, por mbetet në pozita komode në krye, me pesë pikë më shumë se Leipzig.