I rrëmbeu titullin Muhamed Ali, ndërron jetë ish kampioni i peshave të rënda

Është ndarë nga jeta në moshën 67 vjeçare, legjenda e boksit amerikan, Leon Spinks.

Spinks tronditi botën e boksit duke mundur Muhamed Ali dhe duke fituar titullin kampion të peshave të rënda vetëm pas 8 ndeshjeve si profesionist.

Ai ndërroi jetë në shtëpinë e tij në Las Vegas, pas një sëmundje të rëndë që e mundonte prej disa kohësh.Ishte bashkëshortja e tij, Brenda Glur Spinks ajo e cila dha lajmin e rëndë përmes një deklarate për shtyp.

Karriera e tij në nivel amator ishte gjithashtu e jashtëzakonshme, teksa fitoi një medalje të artë në Lojërat Olimpike të Montrealit në vitin 1976 në kategorinë e peshave të rënda. Në karrierën e tij 18-vjeçare ai numëron 46 duele, me një rekord prej 26 fitoreve, 17 humbjeve dhe tri barazimeve.

Një vit pas debutimit të tij në boksin profesionist, Spinks menjëherë pati një shansin për të dueluar kundër më të mirit të të gjitha kohërave. Në hotelin “Hilton”, në Las Vegas, në mbrëmjen e 15 shkurtit 1978, parashikimet anon nga Aliu 36-vjeçar, por boksieri nga Saint Louis mahniti të gjithë botën duke fituar me pikë në 15 raunde (144-141, 142-143, 145-140 ishin pikët e tre gjyqtarëve). Disa muaj më vonë, më 15 shtator, Ali mori hak duke fituar qartë në 15 raunde dhe për herë të fundit fitoi titullin botëror në peshat e rënda.

Boksi është në ADN-në e familjes Spinks. Vëllai i Leon, Michael, ishte një nga peshat e lehta më të forta në histori (e paharruar përballja e tij në vitin 1988 me Mike Tyson, kur u mposht me nokaut pas vetëm 91 sekondash). Hapat e Leon Spinks ndoqën edhe djemtë e tij Leon Calvin (përdori mbiemrin e nënës së tij dhe fitoi dy luftime profesionale përpara se të vritej në moshën 19 vjeç, kur po largohej nga një festë, në St. Louis) Cory dhe Darrel.