Pas Papa Françeskut, vaksinohet edhe Papa i nderit Benedikti XVI
Vazhdon fushata e vaksinimit në Vatikan, e cila filloi dje paradite më 13 janar pas mbërritjes së serumit. Si Papa Françesku ashtu edhe Papa i nderit Benedikti XVI kanë marrë dozën e parë të vaksinës, njoftoi Vatikani.
"Mund të konfirmoj se në kuadrin e programit të vaksinimit në Shtet Qytetin e Vatikanit - tha drejtori i Zyrës së Shtypit të Selisë së Shenjtë Matteo Bruni, duke iu përgjigjur pyetjeve të gazetarëve - deri më sot është administruar doza e parë e vaksinës për COVID- 19 për Papën Françesku dhe Papën e Nderit".
Papa Françesku pati njoftuar gjatë intervistës me televizionin italian Tg5, të dielën e kaluar, se do të vaksinohej këtë javë, ndërsa sekretari privat i Benediktit XVI, ipeshkvi Georg Gaenswein, konfirmoi se edhe Papa i Nderit do të vaksinohej.
Në atë intervistë Papa Françesku e përcaktoi vaksinimin si "një veprim etik, sepse është në pikëpyetje shëndeti yt personal, por edhe jeta e e të tjerëve".