Hysaj: Po më pëlqen roli i ri në Kombëtare, dua t’i shënoj Lituanisë

Kombëtarja shqiptare e futbollit do të luajë nesër në orën 20:45 në “Air Albania” ndeshjen e dytë të Grupit 4 të Ligës C të Kombeve kundër Lituanisë.

Për të folur për sfidën e nesërme në konferencë për shtyp foli kapiteni Elseid Hysaj.

“Është pak e vështirë ndaj Lituanisë, pasi kemi pasur shumë pak kohë për të rikuperuar energjitë. Kemi parë disa video dhe kemi kuptuar se Lituania luan shumë bukur dhe të vë në rrezik. Luajnë shumë në sulm për të shënuar, por kjo mund të na ndihmojë për të pranuar kundërsulmin.

Roli aktual në Kombëtare? Është një rol i ri, pasi gjithmonë kam luajtur me 4, por më pëlqen si rol, pasi më jep mundësi të shkoj përpara, për të provuar golin. Jam shumë i kënaqur me rolin që më ka dhënë trajneri.

Karriera ime tani është në lulëzim, pasi jam vetëm 26 vjeç. Me Napolin besoj se do të gjejmë një zgjidhje pasi është si shtëpia ime e dytë. Shpresoj që të rinovoj dhe të qëndroj aty për shumë gjatë.

Unë kam shumë qejf të shënoj sa më shumë. Shpresoj që të shënoj dhe më pëlqen goli. Shpresoj që ditën e nesërme të bëj një gol”, u shpreh Hysaj.