Aksidenti në Gjirokastër/ Fëmija që humbi jetën nga Lezha, po priste në radhë

Policia ka dhënë detaje të reja në lidhje me aksidentin e rëndë të ndodhur në rrugën Kakavijë-Gjirokastër.

Sipas të dhënave zyrtare, fëmija që humbi jetën është 10-vjeçari me inicialet S. N., nga Lezha, i cili së bashku me familjen e tij po priste në radhë për të kaluar kufirin, ku shqiptarët prej 3 ditësh janë të bllokuar.

Policia Gjirokastër/ Informacion paraprak.

Rreth orës 10:30, në aksin nacional Kakavije - Gjirokastër, në afërsi të kthesës së Bularatit, një autoambulancë me drejtues shtetasin A. G,  që po transportonte një shtetase të sëmurë  për në spitalin rajonal Gjirokastër, ka përplasur këmbësorin, shtetasin S. N., 10 vjeç, banues në Lezhë, i cili ka humbur jetën.

Drejtuesi i ambulancës është shoqëruar për në ambientet e Komisariatit të Policisë Gjirokastër, ndërsa shtetasja e sëmurë është transportuar me makinë policie drejt spitalit rajonal Gjirokastër.

Në vendngjarje ndodhet grupi hetimor dhe po punon për zbardhjen e plotë të ngjarjes.