Kapet në Portin e Durrësit kamioni me 38 kg heroinë, arrestohet kamionisti
Një kamionist u arrestua në Portin e Durrësit, pasi tentoi të dërgonte në Itali 38 kg heroinë, ndarë në 68 paketa dhe fshehur poshtë sediljeve të kamionit. I arrestuari është Dhimitër Zyka nga Babrruja e Tiranës.
Policia njoftoi se strukturat e saj në Durrës, parandaluan dhe goditën një tjetër tentativë për trafikim të drogave të forta. Si rezultat u vu në pranga shtetasi Dh. Z., 49 vjeç, banues në Babrru, Tiranë.
Në Pikën e Kalimit të Kufirit në Portin e Durrësit, shërbimet e Policisë Kufitare, në bazë të analizës së riskut, ushtruan kontroll të imtësishëm në vijën e dytë, në kamionin që e drejtonte ky shtetas.
Si rezultat i kontrollit, poshtë sediljeve, u konstatuan dy vende të fshehura brenda të cilëve ishin fshehur 68 pako me lëndë narkotike të dyshuar si heroinë.
Në cilësinë e provës materiale u sekuestrua lënda narkotike heroinë me peshë totale rreth 38 kg. Materialet në ngarkim të shtetasit Dh. Z. iu referuan Prokurorisë së Rrethit Gjyqësor Durrës, për veprën penale "Trafikimi i narkotikëve, në bashkëpunim"