Kubikë kanabisi në serë, arrestohen 4 persona në Tiranë

Arrestohen katër persona,  dy në kërkim akuzohen per kultivim të lëndëvë narkotike. Policia e Tiranës bëri të mundur arrestimin e katër personave dhe shpalli në kërkim dy të tjerë, pasi po tentonin të kultivonin kanabis.

Janë sekuestruar kubike me fara kanabisi të cilët do të mbilleshin në një arë në Zall Bastar, bën me dije policia e Tiranës.

Ja njoftimi i plotë:

Finalizohet operacioni policor i koduar “Zall Bastari”.

Operacioni nga Komisariati i Policisë Nr. 4, nën drejtimin e Prokurorisë pranë Gjykatës së Shkallës së Parë Tiranë, i ndjekur me metoda speciale të hetimit.

Goditet një rast i tentativës për kultivim të bimëve narkotike.

Vihen në pranga 4 shtetas, si dhe shpallen në kërkim 2 të tjerë.

Specialistët për Hetimin e Krimit të Komisariatit Nr. 4, në bashkëpunim me Prokurorinë pranë Gjykatës së Shkallës së Parë Tiranë dhe Drejtorinë Vendore të Policisë Tiranë, pas një pune investigative dhe hetimore, në vijim të kontrolleve të pandërprera për parandalimin e kultivimit të bimëve narkotike, organizuan dhe finalizuan operacioni policor “Zall Bastari”, në kuadër të cilit u bë ndalimi i shtetasve:

- I. M., 45 vjeç, banues në Tiranë;

- Q. M., 68 vjeç, banues në Tiranë;

- B. H., 44 vjeç, banues në Tiranë;

- L. M., 44 vjeçe, banuese në Tiranë;

Si dhe u bë shpallja në kërkim e shtetasve N. M., 44 vjeç dhe F. M., 43 vjeçe.

Këta shtetas, në bashkëpunim me njëri-tjetrin, në vendin e quajtur “Zgurë”, Njësia Administrative Zall Bastar, në një serë kanë kultivuar në kubikë fara narkotike, të cilat po tentonin t’i mbillnin në tokë.

Kubikët me fidanë kanabisi u asgjësuan gjatë operacionit dhe një pjesë e tyre u sekuestruan në cilësinë e provës materiale.

Vazhdon puna për identifikimin dhe kapjen e autoreve të tjerë të implikuar në këtë aktivitet kriminal.

Materialet procedurale u referuan në Prokurorisë pranë Gjykatës së Shkallës së Parë Tiranë, për veprën penale "Kultivim i bimëve narkotike, kryer në bashkëpunim".