Lajm shpresëdhënës nga kryeministri i Italisë: Nuk do të jetë një verë karantine, por pushimesh
Kryeministri i Italisë, Giuseppe Conte ka dhënë një lajm shumë të mirë për qytetarët e vendit të tij, të cilët prej pothuajse 3 muajsh qëndrojnë të mbyllur në shtëpitë e tyre për shkak të Koronavirusit.
Kreu i qeverisë italiane ka dhënë përgjigjen e shumëpritur për të gjithë në lidhje me pushimet verore.
“Këtë verë nuk do të qëndrojmë nëpër ballkone dhe bukuria e Italisë nuk do të mbesë në karantinë. Mund të shkojmë në det, në male, të shijojmë qytetet tona, por edhe nëse do ta bëjmë këtë gjë do të duhen rregulla dhe kujdes”, u shpreh Conte.
Conte foli dhe për krizën ekonomike që pritet të godasë Italinë dhe jo vetëm, ku ka theksuar se pritet një rënie të Prodhimit të Brendshëm Bruto dhe pasojat ekonomike do të jenë shumë të dhimbshme.
Ditët e fundit Italia ka regjistruar një rënie sa i përket numrit të rasteve të reja me Covid-19 dhe viktimave. Ditën e sotme, vendi fqinj shënoi vetëm 165 viktima.