Asnjë viktimë nga virusi në tri javë/ Kina raporton vetëm 1 të infektuar në 24 orë

Të marten, Kina tha se ka regjistruar vetëm një rast të ri me koronavirus dhe asnjë viktimë.

Sipas këtyre raportimeve, në Kinë janë bërë tri javë që kur është regjistruar viktima e fundit nga COVID-19, sëmundja që e shkakton koronavirusi.

Nga të dhëat e Komisionit Kombëtar të Shëndetit, 395 pacientë janë duke u trajtuar në spitale, ndërsa 949 persona janë të izoluar dhe nën vëzhgim, pasi kanë dalë pozitivë në testet për koronavirus ose dyshohet se mund të jenë të infektuar.

Deri tani Kina ka raportuar për 4,633 vdekje nga koronavirusi dhe për 82,881 persona të infektuar në total.

Të dhënat e fundit vijnë në kohën kur akuzat Kinë-SHBA për origjinën e koronavirusit, janë ashpërsuar.

Më 3 maj, sekretari amerikan i Shtetit, Mike Pompeo, ka thënë se ka prova se koronavirusi ka dalë nga një laborator në qytetin Vuhan të Kinës.

Kina është përgjigjur duke thënë se pretendimet e tilla janë “çmenduri”.

Organizata Botërore e Shëndetësisë ka thënë se pretendimet e SHBA-së janë spekulative.