Kthesa e fortë/ Vrasjet në Durrës kanë lidhje me grabitjen në Rinas
Kanë marrë një kthesë të fortë hetimet për vrasjet seriale në Durrës, që sipas hetuesve kanë si shkak 5 milionë eurot e grabitura në Rinas nga barku i avionit Tiranë- Vjenë, 9 prillin e 2019.
Nga hetimet e zhvilluara deri tani, dhe informacioni i siguruar nga një prej bashkëpunëtorëve të policisë i arrestuar, katër vrasjet në Durrës janë porositur nga i njëjti grup kriminal, i cili është duke kërkuar “pjesën” nga paratë e zhdukura të grabitjes në Rinas ku mbeti i vrarë Admir Murataj.
22-vjeçari Klevis Alla, i penduari i policisë, ka hedhur dritë mbi vrasjet e ndodhura fillimisht të 2 marsit dhe të 27 prillit 2020, dy vëllezërve Haxhia nga Puka, banorë në Durrës. Sipas burimeve nga grupi hetimor, vëllezërit Haxhia kanë strehuar dhe ndihmuar një prej personave pjesëmarrës në grabitjen e 20 thasëve me para në Rinas, raporton BW.
Grupi kriminal fillimisht ka porositur vrasjen e Dorian Shkozës, në 2 mars pasi edhe ai ka patur dijeni. Edhe vëllezërit Haxhia ishin në dijeni për paratë sipas grupit hetimor.
“Paratë e Rinasit diku janë investuar dhe po kërkohen”. Këto ka thenë midis të tjerave për grupin hetimor i penduari i policisë.
Alla ka treguar se grupi kriminal ka qenë pjesëmarrës edhe në katër ngjarje të tjera kriminale brenda vendit, jo vetëm në qytetin e Durrësit. Anxhelo Avdia, 28-vjeçari që u vra me Dorian Shkozën në Nishtulla në 2 mars, nuk ishte shënjestër. Ai u ndodh rastësisht në vendin e ngjarjes. Porosia ka qenë për pronarin e servisit të makinave, Dorian Shkoza.
I penduari Klevis Alla, 22 vjeç dhe Altin Ndoci 35 vjeç janë arrestuar si autorë të dyshuar të vrasjes së vëllezërve Besmir e Viktor Haxhia në 27 prill. Altin Ndoci ka qënë në varrim të dy vëllezërve si i njohur e mik i tyre. Për të treta ka qenë sërish dhe ka ngushëlluar prindërit duke hedhur 50 mijë lekë në kafe. Prindërit e kanë pyetur për emrin me qëllim që të dinin kush i ngushëlloi, por Altin Ndoci ka dhënë një emër tjetër, pohuan burimet nga grupi hetimor.
Ndërkohë që hetimet vijojnë edhe për disa persona të tjerë që kanë marrë pjesë në ekzekutime, por kanë dijeni edhe për porositësit që për hetuesit janë një grupiI fuqishëm kriminal. Për hetuesit e Durrësit shkak i ekzekutimeve janë paratë e grabitura në Rinas që kanë sjellë disa ngjarje kriminale.