‘Do t’ua ulim pensionistëve’ - (IRIQI bisedon me Ilir Beqjen)
Iriqi:- Ke propozuar t’ua ulësh pensionistëve...
Beqja:- Po ata të ulur e kanë. Hahaha.
Iriqi:- Mos bëj shaka.
Beqja:- Po ç’të bëj. Unë pa punë jam. Dy-tre orë numëroj paratë që fitoj e pastaj e shtyj me gallatë. Dhe për pensionistët nuk thashë t’ua heqim, por t’ua ulim pensionin. Ata lëmoshë e kanë, me aq lekë nuk ia dalin muajit. Shyqyr që i ndihmojnë fëmijët se ndryshe do i korrte uria. Por janë 600 mijë, nga 20 euro të firojnë, shteti fiton 12 milionë euro.
Iriqi:- Me 12 milionë as një km rrugë s’bën qeveria jote.
Beqja:- E vërtetë, po ama paguan kallashët.
Iriqi:- Kallashët?
Beqja:- Po, darovitim mediat. Televizionet s’kanë reklama tani e këto para janë si uji në Sahara.
Iriqi:- Kështu do ia dalë mbarë Rama me virusin?
Beqja:- Rama po lut zotin që ta kapë korona. E ke vënë re se rri pa maskë. E di që situata do shkojë mos më keq e fati i madh po u shtrua në spital. Ndryshe...
Iriqi:- Ndryshe?
Beqja:- Do e izolojë populli në 313, pa amnisti deri 50 vitet e ardhshme.
Iriqi:- Po ai ka premtuar daljen nga pandemia dhe rindërtimin nga tërmeti.
Beqja:- Për rindërtimin Rama ka një plan grandioz. Do hapë tender për kthimin e zonave të shkatërruara në Muze Natyror. Do joshen turistët e me të ardhurat do blihen çadra për banorët. Po çadra që të mos grisen deri 15 vitet e ardhshme.
Iriqi:- Ku do pushosh sivjet?
Beqja:- Në shtëpi.
Iriqi:- Pse?
Beqja:- Po një dhomë e kam plot me para. Lihet vetëm ajo pasuri.
Iriqi:- Po Rama?
Beqja:- Ai ka ca ditë që fle në kishë. Lutet që ta kapë ndonjë virus se e di që populli nuk merret me të sëmurët.
Iriqi:- Mbase fshihet diku në ndonjë shtet larg.
Beqja:- Ai më mirë vdes se sa të ngrihet ndonjë mëngjes diku e kur të hapë TV të shohë që mos flitet për të. Ose kur ta marrin në cel e t’i thonë se të ka sharë e të ka bërë mut Taulant Ballka. Ndaj parashikoj që Rama si Hitleri do rrijë në bunkerin e Surrelit dhe... kaput vetes. Bast po deshe!