Koronavirusi/ FSHF merr vendimin zyrtar: Ndeshjet në Shqipëri do të...

Futbolli në Shqipëri do të vazhdojë aktivitetin pavarësisht rasteve të para të prekura nga koronavirusi.

Komiteti i Emergjencës në Federatën Shqiptare të Futbollit pas mbledhjes së jashtëzakonshme të zhvilluar ditën e sotme vendosi që aktiviteti futbollistik në Shqipëri do të vijojë sipas kalendarit zyrtar.

Por nënvizohet që të gjitha ndeshjet do të zhvillohen me dyer të mbyllura, pa praninë e tifozëve.

NJOFTIMI i PLOTË NGA FSHF:

Komiteti i Emergjencës në Federatën Shqiptare të Futbollit pas mbledhjes së jashtëzakonshme të zhvilluar ditën e sotme dhe komunikimeve zyrtare me Këshillin e Ministrave ka vendosur të njoftojë klubet se aktiviteti futbollistik në Shqipëri do të vijojë sipas kalendarit zyrtar të parashikuar nga Sektori Garave, por ndeshjet do të zhvillohen me dyer të mbyllura.

Kjo masë është marrë pas vendimit të djeshëm të Ministrisë së Shëndetësisë dhe Mbrojtjes Sociale, si dhe në respekt të ruajtjes së shëndetit publik të sportdashëve dhe të gjithë personave të përfshirë në garën futbollistike në vend.

Federata Shqiptare e Futbollit kërkon mirëkuptimin e të gjithë palëve, si një vlerësim objektiv për situatën në cilën ndodhet vendi.

Kujtojmë që ditën e djeshme u mor vendimi i qeverisë shqiptare për mbylljen e çdo aktiviteti sportiv deri më 3 prill prej frikës së përhapjes së koronavirusit.