Bardhi: I kërkuar nga policia, Rama i jep Kajmakut 57 milionë lekë
Partia Demokratike dhe Sekretari i saj i Përgjithshëm Gazment Bardhi i rikthehet edhe një herë Agim Kajmakut, ish-kryebashkiaku socialist i Vorës, tashmë person në kërkim.
Përmes një postimi në rrjetet sociale, ku shfaq edhe një dokument, ku tregohet se, edhe pse i shpallur në kërkim në nëntor 2019, në janar 2020 Kajmaku përfiton një tender prej 57 milionë lekësh.
Bashkëshortja e tij është shpallur fituese dhe ka marrë tenderin për mirëmbajtjen e lulishteve në QSUT.
Bëhet fjalë për shtetasen Merita Kajmaku, bashkëshortja e Agim Kajmakut. Gruaja e Kajmakut, administron kompaninë ‘Kajmaku SH.P.K.’, pasi ia kaloi bashkëshorti i saj më 17 korrik të vitit të kaluar, ndërsa fitoi tenderin nga Agjencia brenda Ministrisë së Brendshme.
Reagimi i plotë i Gazment Bardhit:
Agim Kajmaku është rasti më flagrant i plaçkitjes së buxhetit nën mbrojtjen e Edi Ramës.
Faktet janë të pakundërshtueshme:
1. PD publikoi në Gusht 2019 dokumenta se Agim Kajmaku i Vorës rezulton i dënuar në Greqi, por Edi Rama e mbrojti.
2. Denoncimi i Partisë Demokratike u faktua i vërtetë, por Edi Rama nuk e shkarkoi.
3. Drejtësia kërkoi arrestimin, por Agim Kajmaku u lajmërua më parë dhe u lejua të arratiset.
4. Agim Kajmaku u arratis në nëntor 2019, por Edi Rama i dha në janar 2020 tender 57 milionë lekë.
Duke i dhënë miliona lekë një personi në arrati, që ai e emëroi kryebashkiak të Vorës dhe nuk guxoi ta shkarkonte, Edi Rama dëshmon, në mënyrë të përsëritur, se e vetmja gjë që di të bëjë është të palçkisë paratë e shqiptarëve me ca kriminelë, oligarkë dhe të korruptuar.
Ky tender kriminal duhet anulluar! Paratë e shqiptarëve nuk mund t’i marrë një i arratisur që e ka vendin në burg!