Censurohet filmi ‘I vetëm në shtëpi’, televizioni shtetëror kanadez heq pjesën ku shfaqet Trump
Televizioni shtetëror kanadez CBC ka hequr nga filmi ‘I vetëm në shtëpi: kam humbur në Nju Jork’, skenën ku shfaqet Donald Trump.
Dhe menjëherë ky zhvillim ka ngjallur polemika.
Heqja e skenës është konsideruar nga mbështetësit e Trump dhe konservatorët amerikanë si një lëvizje politike dhe censurë.
Djali i Presidentit amerikan, Donald Trump Junior, e konsideron patetik vendimin e Canadian Broadcasting Company, ndërsa në televizionin Fox kanë plasur kritikat.
Por, heqja e skenës nuk është një zhvillim i orës së fundit.
CBC saktëson se e ka hequr atë në vitin 2014, kur ka blerë të drejtën e transmetimit të filmit dhe kur Trump njihej vetëm për bizneset e tij dhe jo për President.
‘Siç ndodh shpesh për filmat e përshtatur për televizione, edhe ‘I vetëm në shtëpi’ është rishikuar. Skena me Trump ishte një prej atyre që janë hequr’, shpjegon CBC në një komunikatë për shtyp.
Presidenti amerikan nuk e ka marrë seriozisht këtë vendim dhe bën shaka në Twitter duke shkruar se filmi nuk do të jetë më i njëjti.