Zbulohet skandali në Kosovë, vëllai i trajnerit vendos 40 skedina 2/1

Një skandal i rëndë që ka të bëjë me trukimet vjen nga Kosova. Bëhet fjalë për sfidën mes Trepças dhe Fushë Kosovës e vlefshme për javën e 17-të të Ligës së Parë.

Prokuroria e Mitrovicës në mars të këtij viti kishte nisur një hetim në lidhje me këtë përballje. Portali kosovar “Kallxo.com” ka arritur të sigurojë aktakuzën e ngritur në të cilën janë përfshirë katër emra: tre zyrtarë të lartë të klubit nga Mitrovica dhe një të deleguari të Federatës së Futbollit për kurdisje të ndeshjes për ta fiksuar rezultatin në favor të një basti të vënë nga vëllai i trajnerit të klubit që jeton në Belgjikë.

I pandehuri Fidaim Haxhiu në cilësinë e trajnerit të Trepçës u ka thënë lojtarëve para ndeshjes se duhej të humbnin në pjesën e parë dhe të fitonin në të dytën, ashtu si edhe ndodhi.

Prokuroria gjithashtu pretendon që Bejadin Haxhiu, vëllai i trajnerit të klubit, ka vendosur 40 skedina 2/1 për takimin në fjalë dhe duke fituar 10.167.00 euro. Pjesa e parë përfundoi me rezultatin 0-1 në favor të Fushë-Kosovës, ndërkohë që në pjesën e dytë, Trepça përmbysi rezultatin në 2-1.