Haradinaj sqaron elektoratin: Amerikanët gëzohen kur kërkojmë shtet 100%

Gjatë turit të takimeve elekotrale, Ramush Haradinaj është ndalur sot në fshatin Loxhë të Pejës, ku ka folur me banorët e kësaj zone.

Ndër të tjera ai është shprehur edhe për marrëdhëniet me ndërkombëtarët si dhe ka paraqitur para tyre programin qeverisës.

Ramush Haradinaj ka thënë se amerikanët nuk hidhërohen kur Kosova është e vendosur që ta realizojë shtetin 100%, por sipas tij është e kundërta, ata gëzohen për këtë fakt.

“Sa i përket marrëdhënieve me aleatët është që interesi jonë i madh është te jemi 100% shtet. Kujtohet që ne duhet me shku dhe me ia shpjegua aleatëve dobinë që e kanë nga shteti ynë. P.sh. Amerika në bazë  të asaj për çfarë ne qëndrojmë, ata e zhvillojnë politikën dhe raportin e saj me ne. Na nuk i idhnojmë ata, na i gëzojmë ata kur i themi që jemi për shtet 100%”, ka thënë Haradinaj para banorëve të Loxhës.

Haradinaj ka theksuar se më mirë është me dhënë dorëheqje një kryeministër se sa ta dëmtojë interesin nacional.

“Nëse një kryeministër e mbronë vetëm veten, bëhen dëme të paparashikueshme për shtetin”, ka theksuar ai.

Ai ka thënë se qeveria e tij e re do të merret me zhvillimin ekonomik, me fokus në sektorin privat.

“Në të ardhmen dojmë me zhvillu ekonominë, sektorin privat me zhvillu. Sektori publik është rahatu mirë, kemi Ligj për Paga, ka paga të rritura. Po duam që ta thjeshtëzojmë burokracinë. Me u kriju një fond për sigurimin shëndetësor. Në arsim dojmë me u kujdes, që arsimi me u zhvillu bashkë me ekonominë. Jemi të vendosur që t’i bëjmë shtesat për fëmijë, me i përkrahë lehonat dhe nënat vetëushqyese”, ka thënë ai.

Po ashtu, i nominuari për Kryeministër ka bërë një rikujtim të punëve që ka kryer qeveria e tij në 18 muajt e kaluar.