U plakën duke zhvatur portofola me para! Policia i lidh dorë më dorë dy 50-vjeçarët nga Fieri

Dy 50-vjeçarë nga Fieri janë arrestuar nga Policia e Vlorës më fund pasi bënin kërdinë duke zhvatur qytetarët. E kishin nisur misionin e tyre që në rini, ishin burgosur për këtë, por nuk hiqnin dot dorë!

Policia e Vlorës më në fund ka nisur një operacion "Portofoli" për të zbuluar kush ishin mjeshtrat dhe pas një një pune hetimore, ndjekjeje dhe vëzhgimi prej afro dy muajsh, zbuloi se ishin këta të dy në video dhe foto: A. T., 53 vjeç, banues në Fier , dënuar më parë për vjedhje dhe E. P., 52 vjeç, banues në Fier, i dënuar më parë për falsifikim dokumentesh.

Cili ishte stili i tyre? A. T. dhe E. P. vidhnin kryesisht në ambiente ose mjedise ku ofroheshin shërbime publike, me qëllim që të përfitonin nga grumbullimi i njerëzve. Lexoni çfarë njoftoi Policia e Vlorës sot.

Njoftimi i plotë i policisë:

Vlorë

Finalizohet operacioni i koduar "Portofoli"

Ndalohen nga policia dy shtetas, të cilët në bashkëpunim, kanë kryer një sërë vjedhjesh në qytet, kryesisht portofolë nga qytetarë të ndryshëm.

Seksioni i Hetimit të Krimit pranë Komisariatit të Policisë Vlorë, në vijim të një pune hetimore, ndjekjeje dhe vëzhgimi prej afro dy muajsh, kanë bërë të mundur kapjen dhe ndalimin për veprën penale "Vjedhja" në bashkëpunim, shtetasit:

A. T., 53 vjeç, banues në Fier (i dënuar më parë për vjedhje) dhe E. P., 52 vjeç, banues në Fier (i dënuar më parë për falsifikim dokumentesh).

Këta shtetas janë kapur nga Policia pasi në bashkëpunim me njëri-tjetrin kanë vjedhur portofolat e dy shtetasve pranë poliklinikës së qytetit, konkretisht:

Më datë 02.09.2019, në këtë poliklinikë në Vlorë, i kanë vjedhur portofolin nga xhepi shtetasit K. L., dhe i kanë marrë 8 000 lekë.

Më datë 09.09.2019, në të njëjtin vend kanë vjedhur nga xhepi portofolin e shtetasit H. B., nga i cili kanë marrë 4 000 lekë.

Nga puna intensive hetimore e Komisariatit të Policisë Vlorë, kryer prej afro 2 muajsh, ka rezultuar se shtetasit e lartpërmendur janë autorë të dyshuar për kryerjen e 7 vjedhjeve të tjera në qytet, të specifikuara si më poshtë:

• Më datë 26.06.2019, në lagjen "Isa Boletini" Vlorë, i kanë vjedhur portofolin shtetasit E. H.

• Më datë 18.07.2019, në lagjen "29 Nëntori" Vlorë, i kanë vjedhur portofolin shtetases V. H., ku dyshohet se kanë marrë 25 000 lekë dhe 250 euro.

• Më datë 02.07.2019, dyshohet se i kanë vjedhur shtetases norvegjeze H. R., portofolin me 45 000 lekë.

• Më datë 22.06.2019, pranë një marketi, dyshohet se i kanë vjedhur portofolin shtetasit P. N., me një sasi parash prej 400 000 lekësh.

• Më datë 27.02.2019, dyshohet se i kanë vjedhur shtetasit G. M., portofolin me mjete identifikuese brenda.

• Më datë 30.01.2019, në Novoselë, dyshohet se i kanë vjedhur shtetasit F. A., portofolin me një sasi parash prej 4 000 eurosh.

• Më datë 11.01.2019, në ambientet e Spitalit Rajonal Vlorë, dyshohet se i kanë vjedhur shtetases M. Sh., një sasi parash rreth 50 000 lekë dhe 500 euro.

Seksioni i Hetimit të Krimeve ka zbuluar se shtetasit A. T. dhe E. P., i kanë kryer këto veprimtari vjedhjesh kryesisht në ambiente ose mjedise ku ofroheshin shërbime publike, me qëllim që të përfitonin nga grumbullimi i njerëzve.