Ish-ministrit: Largimi i kësaj qeverie është pak, duhet ...

Pas skandalit në lidhje me kompaninë Dunwell Haberman, e cila fitoi lotin e parë prej 18 milionë euro për rindërtimin e Unazës përmes falsifikimit, si dhe 11 milionë të tjera nga tenderi me OST, vjen një reagim nga ish-ministri i Drejtësisë, Ylli Manjani.

Ky i fundit përmes një postimi në ‘Facebook’ ka sulmuar qeverinë ‘Rama’ ndërsa shton se kësaj kompanie iu dhanë para nga taksat e shqiptarëve. Po ashtu ai shtoi se largimi nga pushteti është shumë pak.

Reagimi i plotë i Ylli Manjanit:

I dhanë me tender 18+11 milionë euro pa kriter e pa ligj, një firme që zyrtarisht ishte pa din e pa iman.

I dhanë para nga taksat tona me arrogancë spektakolare, megjithëse dihej që firma nuk kishte asnjë mundësi ligjore ti fitonte ato kontrata me të drejtë.

Tani thonë ‘s’kemi faj se nuk e dinim që një sportelist spitali nuk kishte përvojë në ndërtim infrastrukture’.

Ca më keq akoma të gjithë ‘fajin’ e paska patur noterja që ka vërtetuar përkthimin e një dokumenti, por jo vërtetësinë e përmbajtjes së tij.

Nëse gjendet ndonjë budalla që ende e ha këtë gomarllëk logjikë, ta kenë hallall pushtetin!

Përndryshe largimi nga pushteti është shumë pak.

Kjo, shkurt e thjeshtë quhet: hajni!