SHBA në alarm të kuq, priten sulme
Inteligjenca amerikane ka ndezur alarmin e kuq lidhur me mundësinë e sulmeve kibernetike nga jashtë.
Drejtori i Inteligjencës Kombëtare Amerikane, Dan Coats, konfirmoi se situata gjendet në një pikë kritike.
Ai arrin aty sa që i krahason shenjat paralajmëruese me ato që i paraprinë 11 Shtatorit.
‘Sistemi i alarmit është duke ndezur dhe infrastruktura dixhitale që i shërben vendit tonë po sulmohet,’ shpjegoi ai.
‘Ndodhi në muajt para 11 Shtatorit, sipas drejtorit të atëhershëm të CIA-s, Xhorxh Tenet, që sistemi ishte me alarm të kuq.
Dhe pothuajse dy dekada më vonë, unë jam këtu për t’ju thënë se alarmi i kuq është ndezur përsëri;, u shpreh kreu i inteligjencës amerikane.
Coats iu referua Rusisë, Kinës, Iranit dhe Koresë së Veriut si vende që sipas tij janë ‘duke vazhduar përpjekjet e tyre për të minuar demokracinë amerikane’.
Ai i përshkroi rusët si ‘aktorët e huaj më agresivë nga të gjithë’.
Vende që çdo ditë, tha ai, futen në infrastrukturat tona dixhitale dhe që udhëheqin një sërë ndërhyrjesh kibernetike dhe sulmesh kundër objektivave në Shtetet e Bashkuara.
Pavarësisht se dha këtë alarm kaq të rrezikshëm, shefi i inteligjencës nuk sqaroi se çfarë po bëhet për të parandaluar dhe penguar këto sulme.